Այս տարի չինացիները Նոր տարին կնշեն փետրվարի 11-ին: Ամեն տարի այն նշվում է ձմեռային գիշերահավասարից հետո՝ լուսնի լրիվ շրջափուլի ավարտին հաջորդող նորալուսնի օրը Ըստ Գրիգորյան օրացույցի՝ այդ օրը ընկած է հունվարի 21-ից փետրվարի 21-ի միջև։ «Առաջին լրատվական»-ը փորձեց պարզել, թե ինչով է այս տոնը հատկապես աչքի ընկնում:
Ազգագրագետ Սամվել Մկրտչյանը տեղեկացրեց, որ տոնը ոչ մի նմանություն չունի հայկական Նոր տարվա հետ, քանի որ հայերն ու չինացիները խառնվածքով և ազգային առանձնահատկություններով բավականին տարբեր են: Նոր տարվա օրերին Չինաստանի մի շարք շրջաններում տանը տեղադրում են դեղձի ծառի ծաղկած ճյուղեր կամ էլ տունը զարդարում են մանդարինի ծառերով, որոնց վրա կախված են նարնջագույն պտուղներ։ Փողոցները զարդարում են նոր ծաղկող ճյուղերով և սովորական ծաղիկների փնջերով։ Որոշ շրջաններում էլ նախընտրում են տունը զարդարել ծիրանենու ծաղկած ճյուղերով: Ըստ չինացիների՝ ծաղկած ճյուղը զարթոնքի նշան է և իրենց հաջողություն կբերի:
Երեկոյան, մինչև Նոր տարի, Պեկինում և այլ խոշոր քաղաքներում տեղի է ունենում վիշապի պարի մասսայական ցուցադրություն։ Նոր տարին Չինաստանում տոն է՝ անկախ մարդկանց սոցիալական վիճակից, հարուստ կամ աղքատ լինելուց։ Երեկոյան փողոցներում չինացիները խարույկ են վառում, սկսվում են մասսայական տոնական երթեր:
Չինացիները մինչև Նոր տարի մաքրում են իրենց բնակարանները՝ այդ կերպ փորձելով ազատվել անհաջողություններից և հին իրերից:
