Երևանի քաղաքապետարանն այդպես էլ, փաստորեն, ըստ էության չի պատասխանել «Առաջին լրատվական»-ի հարցին, թե ինչու է Կենտրոնի կանաչ տարածքը կառուցապատման տվել ՀՀԿ պատգամավոր և Կենտրոնի թաղապետի եղբայր Ռուբեն Սադոյանին պատկանող «Յունիգրաֆ-Իքս» ընկերությանը: Ընդ որում, քաղաքապետարանը մեզ իր յուրօրինակ պատասխանն ուղարկել է 2 ամսվա ընթացքում:
«Առաջին լրատվական»-ի խմբագրությունն ահազանգ էր ստացել, որ Երևանի Քաջազնունի փողոցի թիվ 6 շենքի հարևանությամբ` «Յունիգրաֆ-Իքս» ընկերության հետևի բակային տարածքում փոս է փորվում` կառուցապատում իրականացնելու համար: Տարածքը նախատեսված է որպես կանաչ տարածք, թեև կանաչապատված չէ: Մենք Երևանի քաղաքապետարանին խնդրել էինք պատասխանել` իրավական ի՞նչ հիմքով է կառուցապատում կատարվում բակային տարածքում, որն իրականում պիտի կանաչապատվեր, և ինչո՞ւ է շինթույլտվություն տրամադրվել կանաչ տարածքի հաշվին: Ի դեպ, այս պահին արդեն կառույցի 3-րդ հարկն է կառուցվում:
Երկար սպասված պատասխանում քաղաքապետարանից միայն հայտարարում էին, թե կառուցապատումն օրինական է. այն դեպքում, երբ մենք չէինք գրել, որ այն ապօրինի է, հարցրել էինք՝ ինչո՞ւ է կանաչ տարածքում կառուցապատում իրականացվում: «Ի պատասխան Երևանի քաղաքապետարանին ուղղված Ձեր հարցման` աշխատակազմի քաղաքաշինության և հողի վերահսկողության վարչությունից տեղեկացնում են, որ Քաջազնունու փողոց հ.4/1 և 4/3 հասցեներում հասարակական բազմաֆունկցիոնալ շենքի /առևտրի համալիրի/ կառուցման շինարարական աշխատանքներն իրականացվում են Երևանի քաղաքապետարանի հետ 15.06.2012թ. համաձայնեցված հ.01/18-05/1-Ա-2365-518 և 01.10.2012թ. վերահամաձայնեցված հ.01/18-05/1-Ա-5721-937 նախագծերի ու կառուցապատող Էմմա Արիստակեսյանին 15.06.2012թ. տրված հ.01/18-Ա-2359-488 շինարարության թույլտվության համաձայն»,- ասված է քաղաքապետարանի պատասխանում:
Ինչպես տեսնում եք, որևէ բացատրություն չկա, թե ինչու է Երևանի քաղաքապետ Տարոն Մարգարյանը թույլատրել կառուցապատում իրականացնել Կենտրոնի կանաչ տարածքի հաշվին: Չնայած քաղաքապետարանն ասում է, որ կառույցի պատվիրատուն Էմմա Արիստակեսյանն է, մեզ հայտնի է դարձել, որ այդտեղ է տեղափոխվելու ՀՀԿ-ական պատգամավոր Ռուբեն Սադոյանին պատկանող «Յունիգրաֆ-Իքս» ընկերությունը, և կառուցապատողը հենց «Յունիգրաֆ-Իքս»-ն է: Նախօրեին զանգահարեցինք ՀՀԿ-ական պատգամավոր Ռուբեն Սադոյանին՝ փորձելով նրանից տեղեկանալ կառույցի մասին, սակայն լսելով, թե ինչ հարցով ենք զանգել, ՀՀԿ պատգամավորը հայտարարեց. «Ես կառուցապատում չեմ անում, և ձեր հետ էլ խոսակցությունը չեմ ցանկանում շարունակել»:
Հայտնի է, որ 2005 թվականին Սադոյանի հիմնադրած «Յունիգրաֆ-Իքս»-ը պայքարում է թափառող շների դեմ` քաղաքապետարանի գումարներով. հաղթող է ճանաչվում մրցույթներում ու իրականացնում քաղաքապետարանի պատվերը: Փաստորեն, Կենտրոնից ընտրված ՀՀԿ պատգամավորը, ով Գագիկ Բեգլարյանի հովանավորյալն է, ոչ միայն քաղաքում թափառող կենդանական աշխարհի դեմ է պայքարում, այլև բուսական. Տարոն Մարգարյանի թույլտվությամբ գրավում է առանց այդ էլ սակավաթիվ կանաչ տարածքները: Այսպիսով, Քաջազնունի փողոցի մայթերի բոլոր սիզամարգերում քարե շինություններ են կառուցվել` կանաչի հաշվին, իսկ Տարոն Մարգարյանը շարունակում է թույլտվություններ տալ և կանաչապատել քաղաքապետարանի մերձակայքը:
Ուշագրավն այն է, որ Ռուբեն Սադոյանը Կենտրոնի թաղապետ Արա Սադոյանի եղբայրն է, ով ի պաշտոնե պարտավոր է ամեն ինչ անել Կենտրոնի կանաչ տարածքները պահպանելու համար: Մինչդեռ նույն փողոցում մնացած սակավաթիվ սիզամարգերը որևէ կերպ չեն մշակվում: Եվ քանի որ Երևանի Կենտրոնում չկառուցապատված բավական քիչ կանաչ տարածք կա, ապա փաստորեն փողոցներին հարակից բակային կանաչ տարածքներն այժմ ևս մեծ հետաքրքրություն են ներկայացնում:
Սա, սակայն, սիզամարգի հաշվին միակ շինարարությունը չէ այդ տարածքում. այժմ շինարարություն է իրականցվում նաև Վարդանանց փողոցի կանաչ տարածքում` ոստիկանության Կենտրոն և Նորք-Մարաշ համայնքների քննչական բաժնի հարևանությամբ: Այս առթիվ քաղաքապետարանը հայտարարել է. «Վարդանանց փողոց հ.30/1 հասցեում հ.40 դպրոցի մարզահրապարակի ստորգետնյա մասում ավտոկայանատեղիի կառուցման, մարզահրապարակի վերակառուցման, և դրան կից՝ եռահարկ առևտրի կենտրոնի կառուցման շինարարական աշխատանքներ իրականացնելու համար առկա է Երևանի քաղաքապետարանի հետ 17.07.2008թ. համաձայնեցված հ.50-05/1-Հ-3084-692 նախագիծը և կառուցապատող Ասատուր Հովհաննիսյանին 15.02.2011թ. տրված հ.02/18-Հ-204-59 շինարարության թույլտվությունը»:
Երևանի կանաչապատման մասին հայտարարություններ անող քաղաքապետ Տարոն Մարգարյանը, փաստորեն, չի նկատում կառուցապատումները կամ անխնամ ու տափաստանների վերածված կանաչ տարածքները հատկապես այն դեպքում, երբ այդ տեղերում կառուցապատում իրականացնում է որևէ պաշտոնյա կամ թաղային հեղինակություն: Ստացվում է՝ Կենտրոնի կանաչ տարածքները կարելի է շատ հանգիստ, օրինական ճանապարհով կառուցապատել, եթե պաշտոնյա ես կամ հովանավոր ունես:
Անցյալ տարի նույն փողոցի մեկ այլ հատվածում` իր «4×4» ավտոլվացման կետի հարևանությամբ կառուցապատում իրականացրեց և այժմ «Մսի աշխարհ» է բացել Երևանի ԲՀԿ-ական ավագանի Արմեն Սահակյանը: Մամուլի ու բնակիչների ահազանգին ի պատասխան քաղաքապետարանից` բողոքից մոտ մեկ ամիս անց, երբ կառույցն արդեն ավարտին էր հասնում, պատասխանեցին, որ իրենք գնացել ու ոչ մի նոր կառույց «չեն հայտնաբերել»` բացահայտ գործարքի գնալով կառուցապատողի հետ: Այդպիսով իրենց գործն ավարտած համարեցին:
Ի դեպ, ինչ վերաբերում է ՀՀԿ-ական պատգամավոր Ռուբեն Սադոյանի «Յունիգրաֆ» ընկերության գործունեությանը և «Թափառող շների դեմ պայքարի» ծրագրի իրականացմանը, ապա օրերս հրավիրված ասուլիսում «Փրկենք կենդանիներին» կազմակերպության անդամները հետաքրքիր մանրամասներ են ներկայացրել Երևանի քաղաքապետարանի կողմից հայտարարված կենդանիների վնասազերծման հայտամրցույթի մասին:
Պարզվում է՝ պետբյուջեից հավելյալ գումարներ ստանալու նպատակով այս հայտամրցույթում ուռճացված կերպով նշված է, թե Երևանում 46 հազար թափառող շուն կա: Եվ սա այն դեպքում, երբ օրինակ` Մոսկվայում այդ թիվը 25 հազար է: Ընդ որում՝ նույն թիվը քաղաքապետարանն արդեն 4 տարի է՝ ներկայացնում է, և տրամաբանական հարց է բարձրացել՝ եթե «Յունիգրաֆ-Իքս»-ը շներին քնեցնում կամ ստերիլացնում է, ինչպե՞ս է, որ թափառող շների՝ քաղաքապետարանի ներկայացրած թվաքանակը չի պակասում: