Բաշար Ասադի լեգիտիմության աղբյուրը սիրիացի ժողովուրդն է: TASS-ի հաղորդմամբ՝ այս մասին Սիրիայի նախագահ Բաշար Ասադն ասել է ռուսական ԶԼՄ-ներին տված հարցազրույցում:
«Այդ հայտարարությունները (Ասադի հեռանալու անհրաժեշտության մասին), որոնք մենք լսում ենք ճգնաժամի ամենասկզբից, արտացոլում են արևմտյան տեսլականը, որը գաղութային է: Քանի որ Արևմուտքը գործընկերային հարաբերություններ չի ընդունում»,- ասել է նա:
«Եթե նրանց մի պետություն դուր չի գալիս, նրանք փորձում են փոխել կառավարությանը կամ նախագահին,- ասել է Ասադը:- Երբ նրանք կիրառում են այդ տրամաբանությունը, հաշվի չեն առնում ժողովրդի ցանկությունը: Նրանց համար ամեն ինչ պարզ է. մեզ դուր չի գալիս նախագահը, մենք նրան կփոխարինենք»:
«Այսօր ժողովուրդները համաձայն չեն, որ իրենց փոխարեն Արևմուտքից որոշեն իրենց ապագան, ճակատագիրը կամ այն, թե ով կկառավարի իրենց,- նշել է Սիրիայի նախագահը:- Նույնը մենք այսօր տեսնում ենք Ուկրաինայում: Եվ դա նրանց նպատակն է Ռուսաստանում: Նրանց դուր չի գալիս նախագահ Վլադիմիր Պուտինը, և նրանք նրան դիվային են հայտարարում: Եվ այդպես ամենուր»:
«Սիրիայի ժողովուրդն ինքը կորոշի իր ճակատագիրը, և մեզ չի հուզում, թե այդ մասին ինչ են ասել արևմտյան երկրները կամ նրանց տարածաշրջանային դաշնակիցները,- ասել է նա:- Մեզ չի հուզում՝ արդյոք նրաք խոսում են՝ նախագահը կհեռանա թե կմնա, նրան լեգիտիմ կճանաչեն թե ոչ: Իմ լեգիտիմության աղբյուրը ժողովուրդն է»:
«Նրանք ուզում են, որ մենք խաղատիկնիկի վերածվենք: Չեմ կարծում, որ Արևմուտքը քաղաքական լուծում ունի,- նշել է Ասադը:- Նա դա չի ուզում: Բնականաբար, երբ ասում եմ Արևմուտք, նկատի ունեմ, ամենից առաջ, ԱՄՆ-ին, Ֆրանսիային, Բրիտանիային»:
«Այդ երկրները քաղաքական կարգավորում չեն ուզում: Նրանց համար դա պետությունը քանդելն ու այն խաղատիկնիկայինի փոխարինելն է, ինչպես դա տեղի ունեցավ Ուկրաինայում,- նշել է Ասադը:- Նրանց համար (Արևմուտքի) այն, ինչ եղավ Ուկրաինայում, հենց դա է քաղաքական կարգավորումը»:
«Եթե Ուկրաինայում իշխանության գլուխ մնար ժողովրդի ընտրած նախագահը, նրանք կասեին, որ նա դիկտատոր է և սպանում է իր ժողովրդին: Նույն պրոպագանդիստական հնարքները: Ուստի Արևմուտքը քաղաքական լուծում չունի: Նրանք ուզում են պատերազմներ հրահրել և իշխանությունը փոխել ամենուր»,- ասել է Սիրիայի նախագահը:
«Ժողովրդական աջակցությունը Սիրիայում պետական ինստիտուտների դիմացկունության հիմքն է: Պետք չէ ժամանակ ծախսել եվրոպացիների հայտարարությունների վրա, որոնք այսօր մի բան են ասում, վաղը՝ ուրիշ»,- հավելել է Ասադը:
