Ադրբեջանի ԱԳՆ-ն ԵՄ պաշտոնատար անձանց կողմից Իսմայիլի իրադարձությունների հետ կապված ձերբակալված անձանց օգտին արված հայտարարությունը դիտարկում է որպես քննության նկատմամբ ճնշման գործոն: Երկրի ԱԳՆ-ն անընդունելի է համարում նման միջամտությունը քննչական գործընթացին: Այս մասին լրագրողներին հայտնել է ԱԳՆ-ի պաշտոնական ներկայացուցիչ Էլման Աբդուլաևը՝ փոխանցում է Trend գործակալությունը:
Նա նշել է, որ ոչ ոք իրավունք չունի միջամտելու այդ հետաքննությանը:
Եվրոպական դիվանագիտության ղեկավար Քեթրին Էշթոնը, ինչպես նաև ԵՄ ընդլայնման քաղաքականության հարցերով հանձնակատար Շտեֆան Ֆյուլեն երեկ անհանգստություն էին հայտնել՝ կապված «Մուսավաթ» կուսակցության ներկայացուցիչների ձերբակալությունների հետ:
Աբդուլաևի խոսքով՝ ԵՄ որոշ պաշտոնատար անձինք օբյեկտիվ չեն գնահատում իրավիճակը և սխալ գնահատական են տալիս դրան: Նա հայտնել է, որ Ադրբեջանի հանդեպ ԵՄ-ի նման մոտեցումը պաշտոնական Բաքուն դիտարկում է որպես անարդարացի և ոչ օբյեկտիվ:
Համատեղ հայտարարության մեջ նրանք Ադրբեջանին կոչ էին արել ապահովել արդար, թափանցիկ և անկախ հետաքննություն:
Նշենք, որ հունվարի 23-ին Իսմայիլիա քաղաքում տեղի էր ունեցել զանգվածային հակամարտություն՝ կապված խուլիգանական գործողությունների հետ: Անկարգություններն ուղեկցվել էին օտար գույքի վնասմամբ: Խուլիգանական գործողությունների հերոսներ էին «Չիրագ» հյուրանոցի սեփականատեր Էմիլի Շամդինովն ու նրա ծանոթը՝ Էլմեդին Մամեդովը:
