Իսպանիայի առաջնության 31-րդ տուրում «Ռեալ»-ն ու «Բարսելոնան» հերթական հաղթանակները տարան համապատասխանաբար Բիլբաոյի «Ատլետիկ»-ի և «Ալմերիա»-ի նկատմամբ:
Կանխավ ավելի բարդ էր համարվում մադրիդցիները խնդիրը. նրանք հանդիպում էին Բիլբաոյի «Ատլետիկ»-ի հետ, որն այս տարի ոչ միայն պայքարում է եվրոգավաթների գոտում հայտնվելու համար, այլև, ավանդույթի համաձայն , առանձնահատուկ է պատրաստվում ոխերիմ մրցակցի հետ հանդիպումներին:
Եթե հաշվի առնենք, որ Մոուրինյոն «կլասիկո»-ից առաջ որոշել էր հանգիստ տալ իր առաջատար խաղացողներին (Օզիլ, Մարսելո, Ռոնալդու, Ալոնսո), ապա սեփական հարկի տակ հանդես եկող «Ատլետիկ»-ի համար սա իրական շանս էր: Ինչևէ, Կապարոսի սաները ոչ միայն ցանկալի արդյունքի չհասան, այլև չկարողացան արժանի դիմադրություն ցույց տալ «արքայական» ակումբին: Հանդիպումն ավարտվեց 0:3 հաշվով: Երկու անգամ 11-մետրանոց նշակետից աչքի ընկավ Կական, երկու անգամն էլ նրա համար հարվածի իրավունք վաստակեց Դի Մարիան: Մեկ անգամ էլ աչքի ընկավ, երկրորդ խաղակեսի միջնամասում խաղադաշտ մտած, Ռոնալդուն:
Ի տարբերություն «Ռեալ»-ի, «Բարսելոնա»-ի համար բոլորը հեշտ հաղթանակ էին կանխատեսում. «Ալմերիա»-ն եզրափակում է մրցաշարային աղյուսակը և առաջին խաղաշրջանում էլ սեփական հարկի տակ 8 անպատասխան գնդակ էր ընդունել կատալոնացիներից:
Որքան էլ տարօրինակ է, «Բարսելոնա»-ն լուրջ խնդիրներ ունեցավ այս խաղում: Չնայած ահռելի առավելությանը` կատալոնացիներին չհաջողվեց առաջին խաղակեսում գրավել մրցակցի դարպասը: Ավելին` երկրորդ խաղակեսի մեկնարկից 5 րոպե անց Կորոնան առաջ մղեց հյուրերին: Ընդունած գոլից հետո Գվարդիոլայի սաներն էլ ավել մեծ թափով սկսեցին գրոհել, և 3 րոպե անց «Ալմերիա»-ի դարպասապահ Դիեգո Ալվեսը կանոնները խախտեց Վիլյաի նկատմամբ, Մեսսին անվրեպ իրացրեց 11-մետրանոց հարվածը` 1:1: 64-րդ րոպեին Մեսսիի անկյունայինից կատարած փոխանցումը եզրափակեց Տիագոն` 2:1, իսկ հանդիպման վերջին րոպեին Մեսսին` օգտվելով մրցակցի պաշտպանի սխալից, միայնակ դուրս եկավ Ալվեսի դիմաց և գնդակը նրա գլխի վրայով նետեց դարպասը` 3:1:
Առջևում «կլասիկո»-ն է, 32-րդ տուրի «Ռեալ»-«Բարսելոն» հանդիպումը չեմպիոնության համար որոշիչ չէ. «Բարսա»-ն պարտվելու դեպքում էլ կշարունակի 5 միավորի առավելություն ունենալ մադրիդցիների նկատմամբ, սակայն «կլասիկո»-ում տոնած հաղթանակը հաճախ ավելին արժե, քան չեմպիոնական տիտղոսը, կամ որևէ այլ մրցանակ: