Վրաստանի նախագահ Միխեիլ Սաակաշվիլին վրդովեցնող է համարել Ազգային գրադարանի շենքի առջև տեղի ունեցածը, որտեղ ուրբաթ օրը բախվել են նրա կողմնակիցներն ու ընդդիմադիրները: Նա երկրի նոր իշխանություններին առաջարկել է փոխզիջման գալ մի շարք հարցերում:
Նախագահի ելույթը հեռարձակվել է վրացական հեռուստատեսության ուղիղ եթերով՝ Թբիլիսիի նախագահական նստավայրից:
«Ես 4 գաղափար եմ տեսնում, որոնք կարող են մեզ միավորել: Առաջին՝ Վրաստանը պետք է անկախ երկիր լինի: Երկրորդ՝ Վրաստանը պետք է ժողովրդավարական լինի, որտեղ մենք կլսենք ժողովրդին, և բնակչությունը կուսակցություններից և կուսակցական ղեկավարներից բարձր կլինի: Երրորդ՝ Վրաստանը պետք է քաղաքակիրթ երկիր լինի, և չորրորդ՝ Վրաստանը պետք է լինի երկիր, որտեղ մարդիկ կապրեն անկախ և առանց վախի»,- ուրբաթ օրը հայտարարել է Սաակաշվիլին:
Նա առաջարկել է «համագործակցել սահմանադրական փոփոխությունների հարցում, որոնք կհաստատեն երկրի եվրաատլանտյան կուրսը»՝ փոխանցում է RIA Novosti-ն:
Սկզբում նախատեսվում էր, որ Սաակաշվիլին ելույթ կունենա Ազգային գրադարանի շենքում, սակայն հետո ծրագրերը փոխվել են, քանի որ շենքի մոտ տեղի է ունեցել Վրաստանի խորհրդարանի կողմից քաղբանտարկյալներ ճանաչված և հունվարին համաներման շրջանակներում ազատ արձակված քաղաքացիների բողոքի ակցիան:
Բախումներ են տեղի ունեցել Սաակաշվիլիի կողմնակիցների և ընդդիմադիրների միջև, որոնց հետևանքով տուժել է խորհրդարանի մի քանի անդամ: Դրանից հետո նախագահի վարչակազմը որոշել է ելույթը տեղափոխել նստավայրի տարածք:
«Վզգլյադ» թերթի հաղորդմամբ՝ ավելի վաղ Վրաստանի ավելի քան 1 մլն 200 հազար քաղաքացի ստորագրել է Միխեիլ Սաակաշվիլիի հրաժարականի պահանջի տակ: Ստորագրությունները վերջին 3 ամսում հավաքել են մի քանի հասարակական կազմակերպություններ՝ երկրի տարբեր շրջաններում:
