«Երկիր» օրաթերթի խմբագիր Բագրատ Եսայանը շատ ճիշտ է համարում «Ժամանակ» օրաթերթի գլխավոր խմբագիր Արման Բաբաջանյանի առաջարկը` արտատպել բոլոր այն հոդվածները, որոնք պատճառ են հանդիսացել լրատվամիջոցների դեմ դատական գործընթացներ սկսելու համար:
Եսայանը տեղեկացրեց, որ «Երկիր» օրաթերթի` Տիգրան Արզաքանցյանի մասին «131 դեմք ու դիմակը» հրապարակումը արդեն իսկ արտատպել է «Հետք» օրաթերթը և կայքէջը:
«Այս առաջարկը տրամաբանական է և երևի թե ընդունելի կարող է լինել: Ինչ վերաբերում է օրենքի փոփոխությանը, ապա ես դեռ չգիտեմ, թե արդյո՞ք օրենքն է պատճառը, որ դատական հայցեր են ներկայացվում, թե՞ այնուամենայնիվ, օրենքի կիրառումը, ինչպես շատ հաճախ լինում է մեր երկրում»,- «Առաջին լրատվականի» հետ զրույցում ասաց Եսայանը:
Եսայանը համոզված է, որ հիմնական խնդիրը դատական պրակտիկայում է, քանզի նույն օրենքը գործում է Եվրոպայում, և այնտեղ խոսքի ազատության հետ պրոբլեմ չկա:
Եսայանը լրատվամիջոցների դեմ դատական գործընթացների ակտիվացումը պայմանավորում է հենց օրենքի ապաքրեականացմամբ. «Քրեական օրենսգրքով լրատվամիջոցների դեմ դատեր հարուցելուց մարդիկ աշխատում էին քիչ թե շատ ձեռնպահ մնալ, բայց հիմա, երբ օրենքը ապաքրեականացվել է և նույնիսկ ֆինանսական փոխհատուցում ստանալու հնարավորություն է ստեղծված, շատերը փորձում են օգտվել, և զարմանալին այն է, որ բոլորն իրենց պատիվն ու արժանապատվությունը գնահատում են առավելագույն` 3 միլիոն դրամի չափով: Տարբեր պետք է լինեին մարդկանց ինքնագնահատականները, բայց դե հայ ենք»:
