Մարտի 1-ին սպանված Տիգրան Խաչատրյանի մոր` Ալլա Հովհաննիսյանի գլխավորած «Մարտի 1» հասարակական կազմակերպությունը դատի է տվել Կրթության և գիտության նախարարությանը` «Հայոց պատմություն» բուհական դասագիրքը երաշխավորելու համար:
Հիմնավորելով, որ դասագրքում տեղ են գտել «իրականությանը չհամապատասխանող, խեղաթյուրված տեղեկություններ, Մարտի 1-ի զոհերը ներկայացվում են որպես հանցագործներ», հայցվոր կողմը Վարչական դատարանից պահանջում է անվավեր ճանաչել դասագիրքը երաշխավորելու մասին նախարար Արմեն Աշոտյանի հրամանը:
Հայցադիմումում նշված է, որ նախարարի հրամանով ոտնահարվում է Մարտի 1-ի զոհերի արժանապատվությունը, խաթարվում է որակյալ կրթության ապահովմանն ուղղված պետական քաղաքականությունը, ըստ այդմ էլ խախտվում է պետության կողմից մարդու արժանապատվության պաշտպանությունը երաշխավորող սահմանադրական պահանջն ու «Բարձրագույն և հետբուհական մասնագիտական կրթության մասին» օրենքը:
