Ռուսաստանի նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը հեռախոսով քննարկել են երկկողմ համագործակցությանն առնչվող հարցեր՝ շեշտը դնելով էներգետիկայի ոլորտում նախագծերի վրա՝ ներառյալ «Թուրքական հոսք» գազատարի: Այս մասին հայտնում է TASS-ը՝ հղում անելով Կրեմլի մամլո ծառայությանը:
«Բարեկամական հիմքով քննարկվել են երկկողմ համագործակցության տարբեր ոլորտներ, բարձր մակարդակով անցկացված Համագործակցության խորհրդի 5-րդ նիստի (Անկարա, 2014թ. դեկտեմբերի 1) կարևոր որոշումների իրագործման ընթացքը՝ էներգետիկայի ոլորտում համատեղ նախագծերի շեշտադրությամբ, այդ թվում նաև՝ «Թուրքական հոսքը»,- ասվում է հաղորդագրության մեջ:
Մամլո ծառայությունում նշել են, որ կարծիքներ են փոխանակվել նաև միջազգային և տարածաշրջանային արդի հարցերի շուրջ և բարձրագույն մակարդակով առաջիկա կապերի գրաֆիկի վերաբերյալ:
Խոսակցությունը նախաձեռնել է թուրքական կողմը:
2014թ. դեկտեմբերի 1-ին «Գազպրոմը» և թուրքական «Բոթաշ» ընկերությունը ստորագրել են փոխըմբռնման հուշագիր Ռուսաստանից Թուրքիա Սև ծովով գազատարի կառուցման մասին: Գազատարի հզորությունը կլինի 63 մլրդ խմ, որից մոտ 50 մլրդ խմ-ը կմատակարարվի թուրք-հունական սահմանին գտնվող նոր գազային հանգույց:
