Ադրբեջանական Salamnews.org կայքի փոխանցմամբ, Ադրբեջանի, Թուրքիայի, Ղազախստանի ու Տաջիկստանի պատվիրակություններն ապրիլի 7-ին Վիեննայում մասնակցել են ԵԱՀԿ մշտական խորհրդի 857-րդ նստաշրջանին, ուր սուր քննադատության են ենթարկել ամերիկյան հոգևորականի կողմից Ղուրանի այրումը: Այս մասին հայտարարել է Ադրբեջանի արտգործնախարարության մամլո քարտուղար Էլհան Պոլուխովը.
«ԵԱՀԿ-ում Ղազախստանի մշտական ներկայացուցիչ Կայրաթ Աբդռահմանովը հայտարարել է, որ իրենք կտրուկ քննադատում են 2011 թվականի մարտի 20-ին ԱՄՆ-ում հոգևոր առաջնորդի կողմից Ղուրանի այրման ակտը: Դրան հաջորդեց բռնությունների մի ամբողջ շարք, ինչն էլ իր հերթին հանգեցրեց Աֆղանստանում ՄԱԿ-ի ներկայացուցչության աշխատակիցների զոհվելուն:
Մուսուլմանների նկատմամբ նմանատիպ անհանդուրժողական ու խտրական վերաբերմունքը անամոթ ու անպատասխանատու ակցիա է, որը խախտում է տարբեր կրոնների ու կրոնական համայնքների միջև առկա խաղաղ հարաբերությունները: Այդ ծայրահեղական քայլը վիրավորում է համայն աշխարհի մուսուլմանների արժանապատվության զգացումը:
Մենք համապատասխան կառավարություններին կոչ ենք անում իրագործել հանդուրժողականության ու ոչ խտրական վերաբերմունք պարտադրող պահանջները, որոնք ամրագրված են 1975 թվականի Հելսինկյան ամփոփիչ ակտում, 1990 թվականի Փարիզի խարտիայում, 1999 թվականի Եվրոպական անվտանգության խարտիայում և այլուր»:
Հիշեցնենք, որ Ղուրանի այրումից հետո բողոքի ցույցեր էին տեղի ունեցել Կանդահարում և աֆղանական այլ քաղաքներում: Դրանց ժամանակ զոհվել էր 20 մարդ, այդ թվում նաև ՄԱԿ-ի 7 աշխատակից:
