«Առաջին լրատվականի»-ի զրուցակիցն է ՀՀ նախագահի թեկնածու, ԱԻՄ նախագահ Պարույր Հայրիկյանը:
– Պարոն Հայրիկյան, վերջին ասուլիսին հայտարարեցիք, որ Ձեր քարոզարշավը շարունակվում է, և Դուք չեք դիմի Սահմանադրական դատարան: Ի՞նչ փոխվեց այս օրերի ընթացքում:
– Իմ փաստաբանը և ներկայացուցիչներն ասուլիսին հստակ նշել էին, որ մենք այժմ ընտրությունները հետաձգելու գաղափարը չենք կիրառում, քանի որ ի վիճակի ենք շարունակել: Բացի այդ, հավատում էինք, որ նաև մեր մրցակից գործընկերներն իրենց ճիշտ ձևով կպահեն, մանավանդ որ՝ շատ կարևոր է հասկանալ՝ սա դավադրություն է ոչ միայն իմ անձի նկատմամբ, այլ նաև մեր ժողովրդի բնականոն կյանքը խաթարելու նպատակ է հետապնդել: Դրա համար հենց սկզբից մենք բացառել ենք նոր ընտրություններ կազմակերպելու գաղափարը, որը դավադրության առանցքային հարցն է: Ասել ենք, որ այժմ մենք որոշել ենք չդիմել ՍԴ:
Այս օրերին անհասկանալի բաներ կատարվեցին, նախ առողջականի հարցը շատ կարևոր է, սա էլ ազդեց: Մոտիկ մարդիկ ասում են՝ մի տրվիր այդ տեռորին, որովհետև կա ֆիզիկական տեռոր և կա բարոյահոգեբանական-քաղաքական տեռոր, երբ հանկարծ տարբեր խորշերից դուրս են գալիս ԿԳԲ-ի նախկին գործակալներ և հայտարարում են, որ ընդհուպ Հայրիկյանը իր վրա կրակեց: Ես ու իմ ընկերները, փոխանակ զբաղվենք քարոզարշավի նյութեր մատուցելով, ստիպված ենք լինում անընդմեջ պատասխաններ տալ, որ տեսեք՝ կա քննչական մարմնի հայտարարությունը, գնահատականը: Այս ամենը բավականին խանգարում են, որովհետև դա անդրադառնում է առանց այն էլ դժվարությամբ ձեռք բերած վարկանիշի վրա, մենք զրոյական դիրքից հասել ենք մինչև 10-12 տոկոսի, ու հանկարծ պարզվում է, որ մենք պետք է ոչ թե շարունակենք մեր առաջընթացը, այլ հետ գնանք ու զբաղվենք հարցերով, որոնք ընտրարշավի հետ ոչ մի կապ չունեն, ավելին՝ մեզ պախարակում են:
Ինչ վերաբերում է առողջականին՝ իհարկե ցավեր կային, բայց վերքի հատվածը ինձ անհանգստացնում էր, այս հարցում ամեն ինչ դեպի լավն է գնում, բայց զուգահեռ՝ աջ ձեռքս ընդհանրապես չեմ կարողանում շարժել, գիշերը ցավից չեմ կարողանում քնել, նույնիսկ ցավազրկողներն էլ չեն օգնում: Այսինքն՝ բանն այնտեղ հասավ, որ բժիշկները, որ տրամադրված էին երեկ չէ առաջին օրը դուրս գրել, հիմա ասում են՝ ես պետք է երկու օր չշարժվեմ: Ես հետաձգեցի եվրոպական դեսպանների հետ մեկ ամիս առաջ պայմանավորվածությունը, որը վաղն էր կայանալու, այսօր Նվեր Մնացականյանի հաղորդման հյուրը պետք է լինեի, դարձյալ հետաձգեցի:
– Պարոն Հայրիկյան, սա փաստորեն անհաղթահարելի խոչընդոտ է քարոզարշավի ժամանակ, ինչը ենթադրում է՝ կդիմեք ՍԴ:
– Այն ժամանակ էլ ասել ենք, որ, այո, կան անհաղթահարելի խոչընդոտներ, սակայն Հայրիկյանը չի դիմելու ՍԴ, քանի որ մնացյալ ժամանակը բավարար է համարում քարոզարշավի կազմակերպման համար: Բայց հիմա պետք է անկեղծ լինեմ, նաև իմ պայմանականորեն մրցակից ընկերներն իրենց որոշ հայտարարություններով… Մասնավորապես Հրանտ Բագրատյանը ասում է՝ դեռ պետք է պարզենք՝ ինչ մահափորձ է, սա ասում է այն դեպքում, երբ ես մտածում էի՝ մենք կարող ենք միասին թիմ ստեղծել՝ Հրանտ Բագրատյան, Րաֆֆի Հովհաննիսյան, Պարույր Հայրիկյան, և կարճ ժամանակով՝ 60-70 տոկոսով փոխել այս փուլում Հայաստանի վարկանիշը՝ որպես դեմոկրատական երկիր, ընտրություններով իշխանության որևէ ճյուղ փոխելու երկիր, այլև Հայաստանը աշխարհի համար բացառիկ քաղաքակրթություն հաստատող երկիր դարձնել: Հիմա, իմիջիայլոց, լավ շրջան է. այն մարդիկ, ովքեր պետք է լյուստրացիայի ենթարկվեին, իրենք իրենց բացահայտում են:
– Հիմա կդիմե՞ք ՍԴ երկու շաբաթում գոնե Ձեր քարոզարշավը իրականացնելու համար:
– Ես չէի ուզենա, որ մեր նախնական՝ ոչ մի բան չհետաձգելու որոշումը փոխվեր, բայց եթե հայտնվում ես անհավասար պայմաններում, և դա շահարկվում է, ես պետք է մտածեմ նաև Հայաստանի ժողովրդավարության մասին: Երկու օր էլ կդիմանամ, տեսնեմ ինչպես եմ լինում:
– Ինչպե՞ս եք գնահատում իրավապահ մարմինների աշխատանքը, արդյոք զարմանալի՞ չէ, որ մինչև հիմա չկա տեղեկատվություն, չկան կասկածյալներ: Դժգոհություն չունե՞ք, որ Սերժ Սարգսյանն էլ թեև խոստացավ շատ արագ բացահայտել, բայց դեռ ոչինչ բացահայտված չէ:
– Կան արված գնահատականներ, որոնք իրենք պետք է հանրությանը մատուցեն: Ես պարտավոր չեմ ցույց տալ, որ այս գործի կապակցությամբ ես տուժող եմ ճանաչվել, որ քաղաքական գործիչ Հայրիկյանի քաղաքական գործունեությունը կասեցնելու նպատակով սպանության փորձ են կատարել: Այսօր ես պահանջեցի, որ դա հրապարակայնացնեն, և եթե օրվա իշխանությունները երևույթը չեն մատուցում (ես չեմ ասում քննության գաղտնիքները), այդ դեպքում ես իմ գործը թողած՝ պետք է ընկնեմ դա նայեմ: Ես նախագահի թեկնածու եմ, ինձ պետք է ամեն ինչից ազատեն, որ ես կարողանամ իմ ծրագրերը ներկայացնել, որ ժողովուրդը ճիշտ ընտրություն կատարի: Այնպես որ, ասել, որ հիացած եմ՝ իհարկե չեմ կարող, ես շատ դժգոհ եմ, կատարված աշխատանքների գոնե մի մասը հանրությանը մատուցելու տեսանկյունից: Նախագահը կարող է ասել կատարվածը ցավոտ երևույթ է, բայց դատախազը պետք է ելույթ ունենա, ասի, որ սա շարքային սպանություն չէ, այլ որոշակի քաղաքական սպանություն, իսկ սա նշանակում է մեր պետականության դեմ ուղղված հանցագործություն է: Ասում են, որ այս երկու օրվա ընթացքում կուղղեն սխալը, տեսնենք: Նույնիսկ ընտրություններին ընդհանրապես չմասնակցելուց զատ, ես նոր ընտրությունների չեմ գնալու, գուցե երկարացնեմ, բայց նոր ընտրություն չեմ պահանջի, քանի որ իրականում ինձ պետք է սպանեին, որ նոր ընտրություններ լինեն:
– Հնարավոր է, որ պարզել են՝ ովքեր են, միայն թե նրանց անունները հնչեցնելը ձեռնտու չէ իշխանություններին, դրա համար չեն բացահայտում:
– Խելոք մարդիկ ի սկզբանե ոչինչ չեն բացառում, նրանք ասում են՝ տեսնենք. ես փորձում եմ մի քիչ խելոք լինել, ես ոչինչ չեմ բացառում: Ավելին՝ այսօր մի տեղ խոսել եմ այն բանի մասին, որ չեմ բացառում, որ նույնիսկ բացահայտվի իրական կատարողը, և մեծ գործարք կատարվի նրա հետ, ինձ ասացին, որ դա բացառվում է, որ աշխատանքը շատ հրապարակային է:
– Այսինքն՝ անվտանգության ապահովման համար երաշխիքներ այս պահի՞ն էլ չկան:
– Աշխարհի ոչ մի երկրում, ցավոք սրտի, այդպիսի կատարյալ 100 տոկոսանոց երաշխիքներ չկան, Ամերիկայի պես հզոր երկրում մինչև հիմա Քենեդու սպանությունը չի բացահայտվել:
Լևոն Բաղդասարյան՝ Պարույր Հայրիկյանի փաստաբան. Մամուլում տեղեկատվություն էր տարածվել, որ Պարույր Հայրիկյանի վնասվածքը հրազենային չէ, ցանկանում եմ տեղեկացնել, որ քրեական գործի շրջանակներում դատաբժշկական փորձագետի եզրակացությունից բացի, այսօր պաշտոնապես իրազեկեցին մեզ, համաձայն որի Պարույր Հայրիկյանի ստացած մարմնական վնասվածքը հրազենային է՝ առողջության տևական քայքայմամբ, այսինքն՝ մամուլում տարածված տեղեկությունը, որ հրազենային չէ վնասվածքը, ապատեղեկատվություն է:
