Սենատում հանրապետական փոքրամասնության ղեկավար Միտչ Մաքքոնելը կարծում է, որ նախագահ Բարաք Օբամային պետք չէ հաջորդ նախագահականի ժամանակ վերընտրել, որպեսզի հանրապետականները հնարավորություն ունենան քննադատելու նրա քաղաքական որոշումները, որոնք Մաքքոնելն անվանում է «երկրի համար կործանարար», հանրապետականներ-դեմոկրատներ մրցակցությանն է անդրադարձել «Ամերիկայի ձայնը»:
«ժառանգություն» հիմնադրամում ունեցած ելույթի ժամանակ հանրապետական գործիչը հայտարարել է, որ իր կուսակցության հաղթանակը երեքշաբթի կայացած միջանկյալ ընտրություններում ցույց տվեց, որ ամերիկացիները մերժել են Օբամային:
Հանրապետականներն այժմ վերահսկում են Ներկայացուցիչների պալատը, իսկ դեմոկրատները մեծամասնություն ունեն Սենատում: Կոնգրեսի նոր կազմի առաջիկա նիստը կկայանա հունվարին: Մաքքոնելը նաեւ անդրադարձել է այն մեղադրանքին, համաձայն որի` ինքը պայքարում է ոչ թե գործազրկության կրճատման եւ տնտեսական աճի, այլ Օբամայի չվերընտրվելու համար: «Փաստը նա է, որ մեր առաջնային նպատակն է առողջապահության ծախսերի, տնտեսական օգնության ծավալների եւ կառավարության քանակի կրճատումը, եւ դրան հասնելու հիմնական միջոցը հետեւյալն է` Սպիտակ տուն բերել մեկին, ով վետո կդնի այս ամենի վրա»,- ասել է Միտչ Մաքքոնելը: Նրա խոսքով, հանրապետականները չեն կարող ակնկալել, որ նախագահը կլսի ընտրողներին եւ կհամագործակցի հանրապետականների հետ:
Սպիտակ տանը կայացած ասուլիսի ժամանակ Օբաման հայտարարել է, որ ինքն ունի ընտրողների ուղերձի այլ մեկնաբանություն:
«Վերջին երկու տարիների ընթացքում մենք հասել ենք առաջընթացի, բայց նաեւ ակնհայտ է, որ շատ ամերիկացիներ դա դեռ չեն զգացել: Երեկ նրանք դա մեզ ասացին: Որպես նախագահ` ես ընդունում եմ դրա պատասխանատվությունը»:
Նախագահը նշել է, որ ընտրողներն իրենց առաջնորդներից պահանջում են ավելի շատ կենտրոնանալ տնտեսության եւ նոր աշխատատեղերի ստեղծման ու հների պահպանման հարցերի վրա: Նա ասել է, որ պատրաստվում է ընդհանուր լեզու գտնել Ներկայացուցիչների պալատի հանրապետական մեծամասնության հետ: Նա նաեւ նշել է, որ շատ փոփոխություններ չի պատրաստվում մտցնել առողջապահության մասին օրենքում: Իսկ Մաքքոնելն էլ հակադարձել է, որ հանրապետականները առողջապահության մասին օրինագծի դեմ պայքարելու են բոլոր հնարավոր միջոցներով:
Նորման Օրնստեյնը` պահպանողական Ամերիկյան ձեռներեցության ինստիտուտից, նշում է, որ Կոնգրեսի եւ նախագահի առճակատումը խորհրդարանում կարող է բերել կառավարության աշխատանքների արգելափակմանը: Նա օրինակ է բերել 1994թ., երբ Ներկայացուցիչների պալատի ղեկավար Նյուտ Գինգրիչի վետոյից հետո Բիլ Քլինթոնի կառավարությունը ստիպված է եղել ժամանակավորապես դադարեցնել աշխատանքը:
