Ստամբուլահայ հայտնի ռոք երգիչ Հայկո Ջեփքինը թուրքական «Ռադիկալ» պարբերականին տված հարցազրույցում պատմել է, թե որքան դժվար է Թուրքիայում ազգային փոքրամասնություն լինելը։
«Այժմ ավելի դժվար է փոքրամասնության ներկայացուցիչների համար։ Այն ժամանակ ես փոքրամասնություն էի, բայց այժմ դուք ևս փոքրամասնություն եք։ Փոքր ժամանակ հայ լինելու մասին ինձ դրսում չէին հարցնում։ Միայն անունս էին տարօրինակ համարում։ Բայց հիմա մարդիկ մշտապես իրար հարցնում են՝ «որտեղի՞ց ես», «ի՞նչ կրոն ես դավանում», «ձեռքդ ի՞նչ է», «ոտքդ ի՞նչ է», «ինչո՞ւ այդպիսի անուն ունես» և այսպես շարունակ։
Մայրս անհանգստանում էր, ասում էր, որ դրսում չասեմ, որ հայ եմ, դրսում հայերեն չխոսեմ, իրեն ոչ թե «մամա», այլ «աննե» (թուրք.՝ մայրիկ) ասեմ»,- ասել է Ջեփքինը։
Նշենք, որ Հայկո Ջեփքինը ծնվել է 1978 թվականի մարտի 11-ին Ստամբուլում, հայկական ընտանիքում։ Ներկայումս հայ երգիչը համարվում է Թուրքիայի ամենահայտնի ռոք երաժիշտներից մեկը։
