Վրաստանի արևմուտքում` Զուգդիդի քաղաքում, բախումներ են տեղի ունեցել շուրջ 100 մարդու մասնակցությամբ: Իշխանության և ընդդիմության ներկայացուցիչները միմյանց մեղադրել են սադրանքի մեջ, հաղորդում է «Սվոբոդա» ռադիոկայանը:
Անկարգությունները սկսվել են այն բանից հետո, երբ իշխող «Վրացական երազանք» կոալիցիայի դրոշներով և ընդդեմ նախկին նախագահ Միխեիլ Սաակաշվիլիի պաստառներով հարյուրավոր մարդիկ մոտեցել են «Միասնական ազգային շարժում» նախկին իշխող կուսակցության գրասենյակին, երբ այնտեղ են եղել կուսակցության առաջնորդները:
Հաղորդագրության համաձայն` գործող իշխանությունների կողմնակիցները դժգոհություն են հայտնել այն կապակցությամբ, որ ընդդիմադիր առաջնորդները մարդկանց քարոզել են մասնակցել համաժողովրդական բողոքի ակցիային, որը նշանակված է մարտի 21-ին Թբիլիսիում: Ցուցարարները կպահանջեն կառավարության հրաժարականը:
Նախկին իշխանությունների հակառակորդները ներխուժել են գրասենյակ, որտեղ եղել են Սաակաշվիլիի կողմնակիցները: Ոստիկանությունը շուրջ մեկ ժամ փորձել է բաժանել կռվողներին, որոնք կիրառել են երկաթե և փայտե մահակներ: Տասնյակ վիրավորներ տեղափոխվել են հիվանդանոց, տուժածներից մեկը վերակենդանացման բաժանմունքում է:
