Բունդեսվերի հրամանատարությունը մտադիր է ընդունել նախազգուշական միջոցառումներ՝ կանխելու համար իսլամիստների ներթափանցումը Գերմանիայի զինված ուժեր: Այս մասին տեղեկացնում է Der Spiegel-ը։
ՊՆ-ն նախատեսում է օրենսդրության մեջ կատարել փոփոխություններ, համաձայն որոնց՝ բոլոր զինվորները, ովքեր սովորում են ռազմական զենք գործածել, պետք է ստուգում անցնեն իսլամիստների, ինչպես նաև ուլտրաձախերի և ուլտրաաջերի հետ կապեր ունենալու վերաբերյալ։ Մինչ այսօր զինակոչիկները ծառայություն անցնելիս պարտավոր էին տեղեկացնել քաղաքական կուսակցություններին անդամակցելու մասին, ինչպես նաև երդվել Սահմանադրությամբ։
Ռազմական փորձագետների կարծիքով՝ այս պարզ ընթացակարգն այլևս բավարար չէ, քանի որ երկրում և աշխարհում մեծացել է ահաբեկչության վտանգը։ Մինչ այս մանրամասն ստուգում էին անցնում միայն Բունդեսվերի գաղտնի փաստաթղթերի հետ գործ ունեցող զինծառայողները։ Իսկ այսուհետ հրամանատարությունը կարող է զինակոչիկների մասին այնպիսի տվյալներ պահանջել, որոնց տիրապետում է Գերմանիայի հակահետախուզությունը։
Ինչպես գրում է Der Spiegel-ը՝ Գերմանիայի իրավապահ մարմինները տիրապետում են տվյալների, համաձայն որոնց՝ իսլամիստները մտադիր են իրենց կողմը գրավել Բունդեսվերում ծառայած կամ ծառայող կամավորներին։ Արդյունքում նման նորակոչիկները կարող են իրենց գիտելիքները կիրառել ահաբեկչական գործողություններում։
