Մեծ Բրիտանիայի քաղաքացիներն արդեն մեծ փողեր են վճարել WikiLeaks-ի հիմնադիր Ջուլիան Ասանժի շուրջօրյա հսկողությունը կազմակերպելու համար: Որոշ հաշվարկներով՝ Լոնդոնի ոստիկանության ծառայությունն այդ նպատակով ավելի քան 10 մլն ֆունտ սթեռլինգ է ծախսել: Այս մասին հայտնում է RT-ն:
WikiLeaks-ի պաշտոնական ներկայացուցիչը RT-ին պատմել է, որ այդ գործը լրջորեն վնասել է Շվեդիայի հեղինակությունը:
«Այս բոլոր տարիներին շվեդ դատախազը պնդել է, որ չի կարող Լոնդոն մեկնել հարցաքննության համար, քանի որ դա անօրինական է: Իսկ հիմա անսպասելիորեն բոլոր խոչընդոտներն անհետացան: Ըստ իս՝ դրանք ի սկզբանե ընդամենը դատարկ խոսքեր էին: Այս ամբողջ իրավիճակը ստվեր է գցում Շվեդիայի՝ որպես մարդու իրավունքների ավանդական պաշտպանի, հեղինակության վրա և ապացուցում է, որ այս տարիների ընթացքում նրանք, ըստ երևույթին, պարզապես ձգձգել են գործը սուտ պատճառաբանություններով: Բողոքարկման ընթացքում դատախազին հասկացրին, որ նա, հնարավոր է, տանուլ տա այս գործը, եթե այն այդպես էլ չշարժվի մեռյալ կետից: Դե ինչ, վաղուց ժամանակն է: Չէ՞ որ չորսուկես տարի ոչինչ տեղի չի ունեցել»,- նշել է WikiLeaks-ի պաշտոնական ներկայացուցիչ Քրիստինն Հրաֆնսսոնը:
Հիմա հայտնի է դարձել, որ Շվեդիայի դատախազությունը մտադիր է Ասանժին հարցաքննել Լոնդոնում: Միացյալ Թագավորության իշխանություններն արդեն հայտարարել են, որ դեմ չեն Լոնդոնում Ասանժի հարցաքննությանը, սակայն նրանք նաև հիշեցրել են, որ նա Էկվադորի դեսպանատանն է ապաստանել, և Շվեդիան պետք է պայմանավորվի Էկվադորի դիվանագետների հետ: Դատախազ Մարիան Նյուն ավստրալացու փաստաբաններին հարցում է ուղարկել հարցաքննությանը մասնակցելու և ԴՆԹ թեստ անցնելու նրա համաձայնության վերաբերյալ:
Հիշեցնենք՝ 2015թ. մարտի 1-ին Ջուլիան Ասանժը Շվեդիայի Գերագույն դատարանում բողոքարկել է իր ձերբակալման միջազգային թույլտվության հարցը:
Ասանժը Լոնդոնում Էկվադորի դեսպանությունում է 2012 թվականից, որպեսզի խուսափի Շվեդիա արտահանձնումից: Այնտեղ նրան մեղադրում են սեքսուալ բնույթի հանցագործությունների համար: Ասանժը հերքում է իրեն ուղղված բոլոր մեղադրանքները և դրանք համարում քաղաքականապես մոտիվացված: Նա մտավախություն ունի, որ Ստոկհոլմն իրեն ԱՄՆ կարտաքսի, որտեղ նրան սպառնում է մինչև 35 տարվա ազատազրկում լրտեսության և Պետդեպի գաղտնի փաստաթղթերի չարտոնված հրապարակման մեղադրանքով:
