«Ռուսաստանի նախագահ Վլադիմիր Պուտինն անհետացել է: Ոչ բառացիորեն, բայց նրան մի ամբողջ շաբաթ չեն տեսել հանրության առջև, իսկ նախագահական կայքում տեղադրված նրա գրաֆիկի մասին լուրերը կասկածելի տեսք ունեն»,- գրում է Bloomberg View-ի մեկնաբան Լեոնիդ Բերշիդսկին:
Ըստ հեղինակի՝ դա ապացուցում է, որ Ռուսաստանը վերածվել է իսկական բռնատիրության. «Ցանկացած այլ տեսակի պետություն չէր լինի այսքան ոչ թափանցիկ, իսկ քաղաքացիներն այդ աստիճանի չէին անհանգստանա իրենց ղեկավարի համար»:
Պուտինի մամլո քարտուղար Պեսկովը նախկինում երբեք ստիպված չի եղել բացատրել իր ղեկավարի անբացատրելի բացակայությունը, նշում է հեղինակը: Պուտինն աշխատել է միշտ սպորտային և էներգիայով լեցուն երևալ:
Հիմա Պոսկովը կտրականապես հերքում է, որ Պուտինի հետ ինչ-որ բան կարգին չէ, գաղտնի գործողները բուռն գործունեություն են ծավալել, նշում է հեղինակը: Պուտինի նախկին խորհրդական Անդրեյ Իլարիոնովը բլոգում ենթադրություն է հայտնել, որ նախագահին տապալել են «պնդաճակատները»: Հրատարակիչ Կոնստանտին Ռեմչուկովը Twitter-ում գրել է Իգոր Սեչինի առաջիկա հրաժարականի մասին («դա կնշանակեր, որ Պուտինը կա՛մ ուժեղ թափահարում է մոտ շրջապատը, կա՛մ ինքն է հեռանում»,- ենթադրում է հոդվածագիրը):
«Ռուսները, այդ թվում՝ Պուտինի հակառակորդները, նրա մեկշաբաթյա բացակայությունից անհանգստացած են ոչ պակաս, քան երեխաները, ում հայրն ինչ-որ տեղ հեռացել է ու մի քանի օր չի վերադառնում»,- ասվում է հոդվածում: Մարդիկ անվստահություն և մտահոգություն են զգում հույսի հետ միախառնված՝ գուշակելով՝ արդյոք իշխանության բուրգը կկարողանա՞ գործել առանց Պուտինի և եթե այո՝ ապա ինչպե՞ս:
«Ի՞նչ է, եթե ոչ այն բանի նշան, որ ազգի հավաքական գիտակցության մեջ Պուտինը լիամասշտաբ բռնապետ է դարձել»,- հարցնում է հեղինակը: Միայն բռնապետերն են թաքցնում, որ գրիպով հիվանդ են կամ հանդիպումներ են անցկացնում (որոնք, Պեսկովի խոսքով, եղել են այս ամբողջ ընթացքում):
Ժամանակն է մի կողմ թողնել մեղմասությունները, եզրափակում է հեղինակը, «Պուտինը բռնապետ է, որը Ռուսաստանը ղեկավարում է՝ հենվելով վախի և խորամանկության վրա: Ինչպիսին էլ լինեն նրա բացակայության պատճառները՝ երկիրը չի կարող գործել, երբ նա ղեկի մոտ չէ: Ջրի երես են բարձրանում իռացիոնալ վախեր: Իռացիոնալ հույսեր ևս»:
Պատրաստեց՝ Սոնա Ավագյանը
