Վրաստանի վարչապետ Բիձինա Իվանիշվիլին այսօր երկրի ՊՆ-ում կայացած հանդիպման ընթացքում լսել է նախարարին և Միացյալ շտաբի ներկայացուցիչներին, ովքեր ներկայացրել են կառույցի զարգացման երկարաժամկետ ծրագրերը: Ինչպես հանդիպման ավարտին նշել է Իվանիշվիլին, «խորհրդակցությունը հետաքրքիր է եղել, նախարարներն ու նրանց տեղակալները ներկայացրել են զարգացման երկարաժամկետ ծրագրերն ու ապագայի հեռանկարները»:
Ըստ վարչապետի, նախատեսվում է մինչև 2016-ը վրացական բանակը դնել պրոֆեսիոնալ հիմքերի վրա: Նա նշել է, որ այդ քայլով կընդգծվի Վրաստանի նպատակաուղղվածությունը դեպի ՆԱՏՕ:
Ներքին ռեսուրսների տնտեսման շնորհիվ Իրակլիում հնարավոր է եղել զինծառայողների 89 տոկոսի աշխատավարձը 25 տոկոսով բարձրացնել: Այն տարածվել է նաև Աֆղանստանում ծառայության մեջ գտնվող վրացի զինծառայողների վրա: Վարչապետը նշել է, որ բանակի կրթությունը տարվում է բավականին գիտակցված, սակայն ենթակառուցվածքների տեսակետից Վրաստանին ծանր ժառանգություն է բաժին հասել: Նա ասել է, որ չնայած դրան՝ իրենք լրացուցիչ միջոցներ կգտնեն ամեն բան շտկելու համար:
Իվանիշվիլիի գնահատականներով՝ որոշ հարցերի շուրջ նախարարությունում կաթվածահար վիճակ է եղել: Նա նշել է, որ սննդի հաշվին, որի որակն այսօր անհամեմատ ավելի բարձր է, տնտեսվել է 600 հազար լարի:
Վարչապետին, որպես նվեր, հանձնել են պաշտպանության նախարարության լոգոն, որը նրան շատ է դուր եկել: Վարչապետը նշել է, որ վրացական բանակը Վրաստանի հետ միասին կկարողանա եվրոպական զարգացած պետությունների հետ միևնույն հարթությունում կանգնել, և որ Վրաստանը կունենա արժանավոր զինվորներ, ովքեր կպաշտպանեն հայրենիքի պատիվը: