Հայաստանի և Ադրբեջանի միջև խաղաղության պայմանագրի կնքման հարցում խոչընդոտ է հանդիսանում հանրաքվեի անցկացման հարցը, սակայն այն լուծելի է: Այս մասին հայտարարել է ՌԴ Պետդումայի նախագահ Սերգեյ Նարիշկինը աշխատանքային այցի շրջանակներում Փարիզում Ֆրանսիայի ազգային ժողովի պատգամավորների հետ հանդիպման ժամանակ:
«Հակամարտությունը շատ հեռուն է գնացել, որպեսզի հնարավոր լիներ այն արագ և հեշտ լուծել»,- նշել է Նարիշկինը: Նա կտրականապես չի համաձայնել «Մեդվեդև-Ալիև-Սարգսյան բանակցային հարթակի» վերաբերյալ ֆրանսիացի խորհրդարանականներից մեկի գնահատականի հետ: «Դուք Մեդվեդև-Ալիև-Սարգսյան բանակցային հարթակն անվանում եք ձախողված: Ես նման գնահատականի հետ համամիտ չեմ»,- հայտարարել է Նարիշկինը:
Ըստ նրա՝ իրատեսական վերաբերմունք պետք է ունենալ ստեղծված իրավիճակի նկատմամբ, և սխալ կլինի ակնկալել հակամարտության արագ լուծում: Ինչպես նշել է խոսնակը, եռակողմ բանակցությունների արդյունքներն այսօր առկա են. բավականին հարցերի շուրջ ձեռք է բերվել համաձայնություն, որոնց հիման վրա էլ կարելի է առաջ շարժվել: Նա նաև հավելել է, որ արդյունքներ կան, և դրանք վատը չեն:
Իր հերթին, պատվիրակության անդամ, ՌԴ Պետդումայի ԱՊՀ հարցերով հանձնաժողովի նախագահ Լեոնիդ Սլուցկին հայտարարել է, որ ղարաբաղյան հակամարտության կարգավորման ամենալուրջ արդյունքն այն է, որ այժմ այնտեղ պատերազմ չկա:Ռուս պատգամավորի խոսքերով՝ ներկայումս Բաքվի և Երևանի միջև գոյություն ունի խաղաղ պայմանագրի նախագիծ, որի կետերից միայն երկու-երեքի շուրջ են ձեռք բերվել համաձայնություններ:
Նա նշել է, որ առաջին քայլն ուղղված է Լեռնային Ղարաբաղի շուրջ գտնվող տարածքներից ռազմական ուժերի դուրս բերմանը: Սակայն փաստաթղթում ամենագլխավորը, ըստ պատգամավորի, հանրաքվե անցկացնելու մասին կետն է, և հենց այդ կետն էլ համարվում է «խոչընդոտ»: Սլուցկին ուշադրություն է հրավիրել այն բանի վրա, որ կողմերը նման առաջարկ անելիս առաջնորդվել են ֆրանսիացիների` հանրաքվե անցկացնելու փորձով: Նա հույս է հայտնել, որ Լեռնային Ղարաբաղի խնդրի լուծումը կգտնվի, և դրա համար հիմքեր կան: Նա նաև ասել է, որ, իր կարծիքով, մինչև այս տարվա վերջը կհաջողվի հարցը մեռյալ կետից շարժել՝ առաջնորդվելով համաձայնագրի` հանրաքվե անցկացնելու կետով: