«Մենք այսօր չունենք մեր արժույթը: Մեր արժույթը հայկական դրամն է, եւ եթե Հայաստանը որոշում կայացնի փոխել արժույթը, ապա նույն տարբերակը կաշխատի նաև Արցախում, այսինքն` փոխված արժույթը կգործի նաև Արցախում»,- «Առաջին լրատվական»-ի հետ զրույցում ասաց ԼՂՀ վարչապետ Արա Հարությունյանը՝ անդրադառնալով Ռուսաստանի նախագահ Վլադիմիր Պուտինի` երեկվա հանձնարարությանը, որով, ըստ էության, նախատեսվում է մեկ միասնական արժույթ ստեղծել ԵՏՄ անդամ պետությունների համար:
«Արցախը Հայաստան հետ միևնույն տնտեսական գոտում է, եւ դրանով բոլոր հարցերը փակված են: Բոլոր այն հարցերը, թե Արցախն այս միության անդամը չէ կամ մեկ այլ միության անդամ է, անտեղի են: Կյանքը ցույց տվեց, որ Արցախը Հայաստանի հետ միևնույն տնտեսական գոտում է, ու վերջ»,-հավելեց Արա Հարությունյանը:
Ինչ վերաբերում է արժույթը փոխելու հետևանքներին, ապա, ԼՂՀ վարչապետի խոսքով, դա շատ խորը հարց է, որը ուսումնասիրություններ է պահանջում: «Միևնույն ժամանակ, կարող եմ ասել, որ խոշորացումներն ունեն իրենց դրական եւ բացասական կողմերը: Բայց մենք իրավունք չունենք եվրոյի օրինակը վերցնելու եւ դրանով առաջնորդվելու: Միևնույն ժամանակ, մենք իրավունք չունենք որեւէ այլ արժույթ վերցնելու եւ համեմատություններ անելու: Դրա համար պետք է բոլոր նրբությունները, ռիսկերն ամբողջությամբ գնահատել, առանձնացնել առավելությունները եւ նոր միայն կոնկրետ որոշում կայացնել»,- ասաց ԼՂՀ վարչապետը:
Հիշեցնենք, որ երեկ Վլադիմիր Պուտինը հանձնարարել է Ռուսաստանի Կենտրոնական բանկին` ՌԴ կառավարության ու Եվրասիական միության անդամ երկրների կենտրոնական բանկերի հետ միասին որոշել Եվրասիական տնտեսական միության շրջանակում արժութային ու ֆինանսական ոլորտներում ինտեգրացիայի հետագա ուղղությունները եւ հեռանկարում արժութային միություն ստեղծելու նպատակահարմարությունն ու հնարավորությունը: Պուտինի այս հանձնարարությունը պետք է իրագործվի մինչև այս տարվա սեպտեմբերի 1-ը, որից հետո, եթե ուսումնասիրությունների արդյունքները դրական լինեն, թերևս ԵՏՄ անդամ պետությունները կունենան մեկ միասնական արժույթ:
