Լոս Անջելեսի դատարանը բավարարել է Blurred Lines երգը կատարող Ֆարել Ուիլյամսի և Ռոբին Թիքի դեմ երգիչ Մարվին Գեյի ընտանիքի հայցը: Երաժիշտները 7,3 մլն դոլար կվճարեն հեղինակային իրավունքների մասին օրենքի խախտման համար, հայտնում է Variety-ն: Սոուլ-երաժշտության լեգենդի ժառանգները պնդում էին, որ 2011 թ. թողարկված և հիթ դարձած Blurred Lines ստեղծագործությունը կրկնօրինակում է Գեյի՝ 1977 թ. գրված Got to Give It Up երգը:
«Հիմա ես ինձ ազատ եմ զգում: Ազատ Ֆարել Ուիլյամսի և Ռոբին Թիքի շղթաներից, նրանց ստից ու արդարադատությունից խուսափելու փորձերից»,- ասել է Մարվին Գեյի դուստր Նոնան:
Գեյ ընտանիքի փաստաբան Ռիչարդ Բուշը հայտարարել է, որ կձգտի Blurred Lines-ի տարածման արգելքի և համապատասխան փաստաթղթերը դատարանին կհանձնի առաջիկա շաբաթվա ընթացքում:
Ուիլյամսը և Թիքը ներկա են եղել դատերին, մասնակցել են երկու երգերի համեմատությանը: Blurred Lines-ի և Got to Give It Up-ի բասային մասերի ժամանակ Ուիլյամսը խոստովանել է նմանությունը՝ նշելով. «Այնպես է հնչում, կարծես նույն թրեքն է»:
Հայցվորները սկզբում 25 մլն դոլար փոխահուտցում են ակնկալել:
Blurred Lines-ն առաջադրվել է «Գրեմմի»-2013-ում «Տարվա լավագույն ձասյնագրություն» անվանակարգում և 10 շաբաթ շարունակ եղել է Billboard չարթի վերնամասում: Դատարանի տեղեկությամբ՝ այն արդեն ավելի քան 16,5 մլն դոլար եկամուտ է բերել, որից 5-ական միլիոնը՝ անձամբ Թիքին և Ուիլյամսին:
