Իրանի արտգործնախարար Ալի Աքբար Սալեհին փետրվարի 11-ին երկօրյա այցով կմեկնի Մոսկվա՝ մասնակցելու ռուս-իրանական միջկառավարական հանձնաժողովի հանդիպմանը: Այս մասին հայտնում է RIA Novosti-ն՝ հղում անելով ՌԴ-ում Իրանի դեսպան Սայիդ Մահմուդ Ռեզա Սաջադիին:
Նրա խոսքով՝ հանդիպման շրջանակում էներգետիկայի, առևտրի, արդյունաբերության և բանկային գործունեության ոլորտների ռուս և իրանցի մասնագետները կքննարկեն ավելի վաղ ստորագրված երկկողմ համաձայնագրերի իրականացմանը վերաբերող հարցեր: Հանդիպման ավարտին հանձնաժողովի համանախագահները համատեղ արձանագրություն կստորագրեն, որի նախագծի վրա էլ այժմ աշխատանք է տարվում:
