Գիտնականները պնդում են, որ կանանց մոտ կրծքագեղձի քաղցկեղի առաջացման սպառնալիքը երկու անգամ մեծանում է, եթե նրա ընտանիքում տղամարդիկ են եղել, ովքեր տառապել են շագանակագեղձի քաղցկեղով: Մասնագետներն իրենց աշխատանքն ամբողջությամբ հրապարակել են CANCER ամսագրում:
Ուսումնասիրությանը 78 171 կանայք են մասնակցել: Աշխատանքը սկսվել է 1993-1998 թթ., երբ փորձի մասնակիցները կրծքագեղձի քաղցկեղ չեն ունեցել, և ավարտվել է 2009 թ.: Այդ ժամանակահատվածում 3506 կին հիվանդության զոհ է դարձել: Մասնագետներին վաղուց հայտնի է, որ ժառանգականությունը քաղցկեղային ուռուցքների զարգացման մեջ ահռելի դեր է խաղում, սակայն նախկինում հիվանդության պատմությունն ուսումնասիրելիս ուշադրություն չէին դարձնում ընտանիքում հակառակ սեռի առողջական վիճակին:
Մասնագետները պնդում են, որ տղամարդկանց մոտ շագանակագեղձի ուռուցքի առկայությունը կրկնակի անգամ ավելացնում է ընտանիքում կանանց մոտ կրծքագեղձի քաղցկեղի զարգացման հավանականությունը: Գիտնականները համոզված են, որ իրենց աշխատանքը կստիպի բժիշկներին ավելի մեծ ուշադրություն դարձնել ընտանիքի բոլոր անդամների հիվանդությունների պատմությանը: Ավելին, այժմ ուսումնասիրողները նոր հնարավորություն կստանան քաղցկեղային բջիջների գենետիկ մուտացիաներ ուսումնասիրելու համար:
