Google-ը թողարկել է Android 5.1 օպերացիոն համակարգը, որի գլխավոր նորամուծությունը, թերևս, Device Protection գործառույթն է։ Այն թույլ է տալիս հեռահար կերպով արգելափակել գողացված սարքը: Այս մասին հայտնում է hitech.vesti.ru-ն։
Պաշտպանության ակտիվացումից հետո սմարթֆոնից օգտվելու համար պետք է մուտք գործել Google-ի էջ: Եթե հանցագործը գաղտնաբառը չգիտի, սմարթֆոնի փոխարեն չաշխատող «սալիկ» կստանա: Արգելափակումը չի հանվի նույնիսկ սմարթֆոնը գործարանային վիճակի բերելու դեպքում: Այսինքն՝ գողը չի կարողանա պարզապես «զրոյացնել» սարքը և վերավաճառել այն:
Վատն այն է, որ նոր գործառույթը կաշխատի միայն Android 5.1-ով թողարկված նոր սարքերի դեպքում: Բանն այն է, որ այդպիսի պաշտպանության ապահովումը որոշակի բարելավումներ է պահանջում: Բացառություն են Motorola-ի Nexus 6 պլանշետոֆոնը և HTC-ի Nexus 9 պլանշետը, որոնց համար նոր պաշտպանությունը հասանելի կլինի:
Google-ը նաև նոր օպերացիոն համակարգում տարբեր գործառույթներ է ավելացրել, որոնք նախկինում սովորաբար համակարգում ընդգրկել են արտադրողների հավելումների միջոցով: Այսպես. ներմուծված է մի քանի SIM-ի «բուն» աջակցություն, հնարավորություն է ստեղծվել Wi-Fi ցանցերը և Bluetooth սարքերը կառավարել ուղղակիորեն արագ կարգավորումների «պատուհանից»: Android 5.1-ը նաև աջակցում է HD-որակով աուդիոզանգերին:
Նորույթն առաջինը կստանան Nexus-սարքերը:
