«Առաջին լրատվական»-ի զրուցակիցն է ԱԺ Հանրապետական խմբակցության ղեկավար Գալուստ Սահակյանը:
– Ճի՞շտ են այն պնդումները, թե Պարույր Հայրիկյանն իր` ՍԴ չդիմելու որոշումը կայացրել է իշխանությունների ճնշումների արդյունքում, և որ նա նախապես նախագահ Սերժ Սարգսյանի ուղղորդմամբ է առաջադրվել: Չէ՞ որ նա նախապես ասել էր, թե ստիպված է օգտվել Սահմանադրության ընձեռած հնարավորությունից և 2 շաբաթ հետաձգել ընտրությունները:
– Պ. Հայրիկյանն իր ապրած կյանքով երբևիցե չի եղել, որ վճռական չլինի իր գործողությունների մեջ: Այնպես որ, հնարավոր չէ նրա վրա որևէ ազդեցություն ունենալ, հատկապես, որ սովետմիության կալանավայրերի մամլիչի տակով է անցել: Նա միշտ էլ անկոտրում է և երբևիցե չի փորձի այլ խորհուրդներով առաջնորդվել: Դա իր վճռականության հետևանքն է:
– Դո՞ւք էլ եք այն կարծիքին, թե նրա մահափորձի հետևում այն ուժերն են, որոնք թեկնածու չեն առաջադրել:
– Բնականաբար, կարելի է այդպես էլ հասկանալ: Յուրաքանչյուր մարդ իր մտքում կարող է շատ բան առաջարկել, բայց իրավունք չունի հանիրավի մեղադրել մեկ այլ թիմի: Դա քաղաքականությանը ոչ հատուկ բամբասանք է:
– Իսկ Պ. Հայրիկյանը թիրախն ուղղեց Ռուսաստանի կողմը:
– Ես ոչ ուզում եմ որևէ երկրի կողմը ուղղել, ոչ էլ ներսի, որովհետև չի կարելի նման դեպքերը շահարկել: Ես կարծում եմ` լիազոր մարմինները բավականին լուրջ են աշխատում այդ ուղղությամբ և մեղադրել՝ անմեղության կանխավարկածը հաշվի չառնելով, դա լոկ քաղաքական շահարկում է կամ բամբասանք:
– Երեկ ինչո՞ւ Դուք դահլիճից դուրս ուղեկցեցիք ԲՀԿ ղեկավար Գագիկ Ծառուկյանին:
– Ես ոչ մեկին չեմ ուղեկցել: Եթե միասին ենք քայլել, ուրեմ ե՞ս եմ ուղեկցել:
– Բայց դուք միասին չէիք քայլում, Դուք նրան դահլիճից դուրս ուղեկցեցիք ոչ թե ընդհանուր, այլ ԱԺ նախագահ Հովիկ Աբրահամյանի մուտքից:
– Ես ընդամենը Ծառուկյանի հետ զրույց ունեի և իրեն խնդրեցի, որ քննարկենք, և քննարկեցինք: Եվ որևիցե դեպքում երբևիցե չեմ ուղեկցել:
– Տարեվերջյան ՀՀԿ-ԲՀԿ լարվածությունն արդեն կարելի՞ է անցած համարել:
– Քաղաքական տեսակետից լարվածություններ իսկապես կարող են լինել, բայց ես կողմնակից եմ մարդկային պարզ փոխհարաբերությունները չդադարեցնելուն: Ես կարծում եմ, որ այս տարիների ընթացքում, եթե ինչ-որ մի բան այնպես չի եղել, մենք խառնել ենք առօրյա կյանքը և ընդհանրապես սկսել ենք թշնամիներ որոնել: Ես թշնամիներ որոնող անձնավորություն չեմ: Այսօր էլ, եթե հակադրվեն ՀՀԿ-ին հանիրավի, բնականաբար նորից կհակադարձեմ ցանկացած կուսակցության: Բայց առօրյա կյանքում, մարդկային փոխհարաբերության մեջ կողմնակից եմ, որ բոլորը իրար հետ հաշտ լինեն: Իսկ դրանից կօգտվի ժողովուրդը:
– Ամեն մի պատգամավոր իրավասո՞ւ է ԱԺ նախագահի մուտքով ելումուտ անել, որ Գ. Ծառուկյանն է անում:
– Դահլիճը լրիվ նոր է, այդ մասին չեմ մտածել, բայց կոնկրետ ես չասեմ այդ իրավունքից, այդ մուտքից հաճախ եմ օգտվում: Ծառուկյանին էլ ես եմ խնդրել բարձրանալ վերև: Կարող էր նաև մեկ այլ պատգամավոր ինձ հետ լինել:
– Միգուցե ԱԺ նախագահ Հովիկ Աբրահամյանի հետ նրա խնամիական կա՞պն է նրան այդ իրավասությունը տվել:
– Բայց խնամին ԱԺ դահլիճում նստած էր, ի՞նչ կապ ունի այդ կապը:
– Գ. Ծառուկյանն ԱԺ ընտրություններից հետո ընդհանրապես նիստերի չի մասնակցել, և Հ. Աբրահամյանի իրավասությունն էր նրան մանդատից զրկելը, ինչը չի արել:
– ԱԺ նախագահն է որոշում, թե նրա բացակայությունը հարգելի է, թե ոչ: Համոզված եմ, որ յուրաքանչյուր անգամ, երբ բացակայել է, որևէ հիմնավոր պատճառաբանություն ներկայացրել է:
– Ես չեմ կարող ասել, թե ինչ հիմնավոր փաստաթղթեր է ներկայացրել, բայց աշխատակազմում նրա հիմնավորումները կան, և ԱԺ նախագահը ինքն է որոշում կայացնում:
Լուսանկարը՝ Գագիկ Շամշյանի