Բրիտանական Դոնկաստեր քաղաքի բնակչուհի Սառա Բրոտիհեմն ընդամենը 21 տարեկան է, բայց, ըստ պաշտոնական բժշկության, նա արդեն ավելի քան 100 անգամ մահացել է: Վերջին 4 տարիներին Սառան տառապում է հազվագյուտ ծանր սրտային հիվանդությամբ` պոստուրալ օրթոստատիկ տախիկարդիայի համախտանիշով: Միայն վերջին տարվա ընթացքում նա 36 անգամ կլինիկական մահ է տարել այն բանից հետո, երբ նրա սիրտը դադարել է բաբախել, և արյան ճնշումն ընկել է:
Իր հիվանդության վրա ուշադրություն հրավիրելու համար Բրոտիհեմը դիմել է ԶԼՄ-ներին և մի տեսանյութ հրապարակել, որում երևում է այն ամենը, ինչ տեղի է ունեցել իր հետ հիվանդանոցում 2012 թ.: Տեսագրության սկզբում ասվում է, որ թույլ նյարդեր ունեցողներին դիտել խորհուրդ չի տրվում, սակայն ինքը` Սառան, նշում է, որ տեսանյութում դեռ թույլ նոպան է:
«Իրականում ինձ քիչ բանով կարելի է օգնել` աղոթքներից բացի: Երբ ես նոպա եմ ունենում, բժիշկները փորձում են որևէ կերպ ինձ ցավ պատճառել, որպեսզի ցավային շոկը վերակենդանացնի ինձ: Պատահել է, երբ նրանք քաշելով հանել են իմ եղունգը, բայց ես ոչ մի կերպ չեմ արձագանքել»,- պատմել է Սառան և հավելել. «Ասում են` երբ մարդը մահանում է, ամենավերջում թուլանում է լսողությունը. իմ փորձը ևս դա է ապացուցում: Ինձ հաճախ են հարցնում վառ լույսի մասին, սակայն նման բան չկա: Ամեն ինչ ուղղակի մթնում է, բայց ես շարունակում եմ լսել սեփական ձայնս, որը դեռ գիտակցությանս մեջ է և փորձում է կապվել նրանց հետ, ովքեր կողքիս են: Նոպայից հետո ես գիտակցության եմ գալիս կրծքի ուժեղ ցավով ու հոգնածությամբ: Ես հիշում եմ՝ ինչ են ասում մարդիկ մինչև իմ անջատվելը: Այնուհետև` ոչինչ…»:
