Ստամբուլի Բողազիչի համալսարանի մի խումբ ուսանողներ «Աթաթուրքի գաղափարախոսության ակումբի» կողմից կազմակերպված հակահայ միջոցառման ժամանակ ներխուժել են դահլիճ և Հայոց ցեղասպանության ժխտման դեմ ակցիա իրականացրել։ Այս մասին գրում է թուրքական «Էթքին» լրատվական գործակալությունը։
Համալսարանին կից գործող «Աթաթուրքի գաղափարախոսության ակումբի» կողմից անցկացվող «Տեղահանության 100-րդ տարում» խորագրով միջոցառումը ձախողվել է Ժողովուրդների դեմոկրատական կոնգրեսի Բողազիչիի խորհրդի նախաձեռնությամբ հավաքված ուսանողների ջանքերով, որոնք հանդես են եկել հայտարարությամբ։
Հայտարարության մեջ, մասնավորապես, ուսանողներն ընդգծել են, որ Մալաթիայում, Կեսարիայում, Քոնիայում, Մարդինում, Ալեքսանդրետում և մի շարք այլ շրջաններում Սուրբ Ծնունդը վերջին անգամ նշվել է 100 տարի առաջ, մինչդեռ Հրանտ Դինքի՝ 4 հազար տարի այդ հողերում ապրող ժողովուրդն այլևս չկա։
Վերջում ուսանողները հանդես են եկել «տեղահանությո´ւն չէ, ցեղասպանությո´ւն է», «առերեսվե´ք Հրանտի հետ, Ցեղասպանության հետ» վանկարկումներով և հեռացել։
