«Առաջին լրատվական»-ի զրուցակիցն է ԱԺ պատգամավոր Էդմոն Մարուքյանը:
-Պարո’ն Մարուքյան, ԲՀԿ արտահերթ համագումարում ԲՀԿ-ն հռչակվեց որպես ընդդիմություն, մինչ այդ, սակայն, «այլընտրանք» բառն էին կիրառում: Ի՞նչ եք կարծում, արդյո՞ք, հանրապետականների բնորոշմամբ, ԲՀԿ-2-ը կարող է դառնալ այդ գաղափարական ընդդիմությունը:
-Ես բարձրաձայնել եմ այլընտրանքային տեսլական ունեցող ընդդիմության անհրաժեշտության մասին, նաև, քաղաքական մշակույթի առումով, իշխանությունների քաղաքական մշակույթից տարբերվող քաղաքական մշակույթ ունեցող ուժի անհրաժեշտության մասին: Ինչ վերաբերում է ընթացող պրոցեսներին կամ ԲՀԿ համագումարում հնչած հայտարարությանը, կարծում եմ` դեռ շատ վաղ է ինչ-որ բան ասել: Այն, որ հայտարարել են` ընդդիմություն են, կարելի է ողջունել, որովհետև վերջապես կա հստակություն, այսինքն՝ թե ինչ ուղղություն է վերցնում կուսակցությունը: Իսկ ինչ վերաբերում է ընթացքին, այս պահին չեմ կարող մեկնաբանել, քանի որ չգիտեմ, թե կուսակցությունն ինչ ձևով իրեն կդրսևորի, որովհետև, բնականաբար, սա այն ԲՀԿ-ն չէ, որը կար` թե’ իր ունեցած հնարավորություններով՝ ֆինանսական, ինստիտուցիոնալ, կազմակերպչական, թե’, մյուս կողմից, մեծաքանակ անդամներ ունենալու առումով, որովհետև բազմաթիվ մարդիկ ընդգրկվել էին` Գագիկ Ծառուկյանի գործոնով պայմանավորված: Հիմա չկա Գագիկ Ծառուկյանը, չկան այդ մարդիկ: Սրանք խնդիրներ են, որոնք ընթացքում կերևան:
Ինչ վերաբերում է այլընտրանքային տեսլական ունեցող ընդդիմությանը, ես այդ հայտարարությունով չեմ տեսնում, որ նրանք մեկ օրվա ընթացքում այլընտրանքային տեսլական ունեցան, և չեմ տեսնում, որ ինչ-որ բան փոխվել է` կապված Հայաստանի եվրոպական ինտեգրացիայի և ապագայի հետ, այսինքն՝ նրանք նույն բևեռում են գտնվում, ինչ այն բոլոր ուժերը, որոնք Հայաստանը բարեհաջող ինտեգրեցին ԵՏՄ-ին: Հետևաբար, այն, ինչ ես պատկերացնում եմ, և այն գաղափարները, որոնք շրջանառության մեջ եմ դնում՝ կապված այլ տեսալական ունեցող քաղաքական ուժի, նոր դեմքերի հետ, դա ընդհանրապես այլ մակարդակի և այլ ակտիվության ուժի մասին է խոսքը:
–Կարծում եք՝ իշխանությանը ձեռնտո՞ւ է նման այլընտրանքային ուժի ձևավորում: Իշխանությունն ինքն է խոսում նման ընդդիմություն ունենալու անհրաժեշտության մասին:
–Ցանկացած լավ գաղափար կարելի է փչացնել, և իշխանությունը ինչքան խոսի նման ընդդիմություն ունենալու մասին, դա նշանակում է` նրանք ուզում են փչացնել այդ գաղսափարը, որովհետև ձեռնտու չէ ունենալ նման ընդդիմություն, ձեռնտու է ունենալ այնպիսի ընդդիմություններ, ինչպիսին այսօր կան: Ընդդիմություններ են, որոնք չեն կարողանում հզորանալ: Ինչ վերաբերում է նրան, թե իշխանությունը թույլ կտա՞, թե՞ ոչ, սա իմ կողմից անընդունելի ձևակերպում է:
-Իշխանությունը սպառնում է արյունահեղությամբ:
-Հայաստանում 25 տարի է` խոսում են արյան մասին: Ես, օրինակ, մինչև փետրվարի 20-ը արյունալի բան չտեսա, որ ցույց չարվեց; Տանկե՞րն էին հանել փողոց, զորքե՞րն էին եկել Երևան… Ամեն ինչ կարելի է արդարացնել արյուն չլինելու հիմնավորումներով, բայց դա հիմնավորում չէ: Ավելին` եթե դու քաղաքակիրթ պայքարի ես գնում` առանց բռնությունների, իշխանության համար ավելի ու ավելի դժվար է լինում քո նկատմամբ բռնություն կիրառել:
Ավելին՝ տեսանյութում:
