Իտալիայի նախկին վարչապետ Սիլվիո Բեռլուսկոնին ծերանոցում այսօր անցկացրել է հասարակական աշխատանքի վերջին օրը, որը նրան որպես պատիժ էր նշանակվել Mediaset խմբում ֆինանսական խարդախությունների համար:
Ինչպես հայտնում է Միլանի Corriere della Sera թերթը, քաղաքական գործչի մեքենան մոտեցել է Չեզանո-Բոսկոնե քաղաքի Sacra Famiglia ծերանոցին առավոտյան ժ. 9.00-ին (Երևանի ժ. 12-ին): Ինչպես նախկինում, այնպես էլ այսօր Բեռլուսկոնին Ալցհեյմերի հիվանդությամբ տառապողների հետ անցկացրել է 4 ժամ:
Բեռլուսկոնին հասարակական աշխատանքի կատարումը սկսել է անցած տարվա մայիսի 9-ից. դատավճռով սահմանված էր շաբաթական 4 ժամ 1 տարվա ընթացքում, սակայն Միլանի Վերաքննիչ դատարանը փետրվարի սկզբին 45 օրով կրճատել էր պատժաժամկետը:
