«Եկեք փաստենք, որ Հայաստանում քառյակներ ու եռյակներ չկան. եթե եռյակի մի գործիչը հրաժարվում է արձագանքել եռյակի մեկ այլ գործչի հայտարարությանը՝ նշելով, որ հարկ չի համարում, բնականաբար, ես այստեղ ավելացնելու բան չունեմ»,- «Առաջին լրատվական»-ի հետ զրույցում նշեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը։
Անդրադառնալով սահմանադրական բարեփոխումներին` նա նշեց, որ, այս առումով, իրենց ծրագրերում ոչինչ չի փոխվել. «Մենք ունենք մեր օրակարգը և գտնում ենք, որ Հայաստանին պետք են սահմանադրական բարեփոխումներ։ Այո, գտնում ենք, որ եկել է ժամանակը, որպեսզի մենք ուղղահայաց քաղաքական համակարգից անցում կատարենք դեպի հորիզոնական քաղաքական համակարգ, որտեղ վճռորոշ կլինի մեկ անձի, մեկ լիդերի կամ, ինչպես հռետորներն են ասում, սուպերլիդերի դերակատարումը, այլ քաղաքական թիմերի դերակատարումը»։
Դիտարկմանը, թե կա կարծիք, որ ԲՀԿ-ին չեզոքացնելու արդյունքում առաջին հարվածն ստացավ ՀԱԿ-ը, և հենց ՀԱԿ-ին չեզոքացնելու համար էին այս քայլերը, Շարմազանովն արձագանքեց. «ՀԱԿ-ն ինքն է իրեն չեզոքացրել, երբ առաջին նախագահն իր քաղաքագիտական վերլուծությամբ փաստացի դարձավ Գագիկ Ծառուկյանի ու ԲՀԿ-ի վերջին վագոնը։ Նա ինքն իրեն դրեց լուսանցքից դուրս, երբ իր քաղաքական ծրագրերը սկսեց կապել մեկ այլ քաղաքական ուժի հետ։ Այդպես է լինում, երբ դու չես վարում ինքնուրույն քաղաքական պրոցես և դառնում ես գնացքի վերջին վագոն, բնականաբար, քո ճակատագիրն այդպես է լինում։ Տեր-Պետրոսյան քաղաքական գործչի վերջին միտինգը ապացուցեց, որ ՀԱԿ-ն այլևս դարձել է ոչ լուրջ դերակատար մեր քաղաքական պայքարում։ Դարձել է մարգինալ քաղաքական ուժ։ Տեր-Պետրոսյանն ինքն էր քննադատում այն քաղաքական գործիչներին, որոնք քննադատում էին իրեն՝ անվանելով ընդդիմության ընդդիմություն։ Վերջին հանրահավաքին Տեր-Պետրոսյանն արեց այն, ինչի համար ինքը քննադատում էր իր ընդդիմախոսներին։ Նա դարձավ ընդդիմության ընդդիմություն, նա մի ամբողջ միտինգ նվիրեց այս կամ այն ուժի քննադատությանը և դրանով իրեն դրեց մարգինալ վիճակում»։
