Համացանցում 7 ծովախոզուկների ժողովրդականությունը դրանց տիրուհուն՝ Մեծ Բրիտանիայի բնակչուհի Լորե Մելլորսին, թույլ է տվել ազատվել աշխատանքից ու դառնալ վիդեոբլոգեր: Դա տեղի է ունեցել այն բանից հետո, երբ կենդանիները տասնյակ հազարավոր երկրպագուներ են ձեռք բերել Youtube-ում՝ հայտնում է The Daily Mail-ը:
Կենդանիների մասին տեսանյութերի հրապարակումը բրիտանուհուն ապահովել է ամենամսյա եկամուտ՝ մոտ 2 հազար ֆունտ ստերլինգի չափով:
Ծովախոզուկների տիրուհու խոսքով՝ ներկայում իր կենդանիներն ունեն 54 հազար բաժանորդ:
«Հիմա ես աշխատում եմ շաբաթական երկու-երեք օր՝ ստեղծելով ու հրապարակելով տեսանյութեր և գրառումներ կատարելով Twitter-ում ու Facebook-ում»,- ասել է Մելլորսը:
Բրիտանուհին իր կենդանիների առօրյային նվիրված Piggiepigpigs ինտերնետային ալիքը սկսել է վարել 2010-ին՝ որպես հոբբի: Հոլովակները շատ արագ լայն ճանաչում են ձեռք բերել ու հավաքել ավելի քան 10 մլն դիտում:
