Արևմտյան երկրները մարդու իրավունքների պաշտպանության քողի ներքո իրականացնում են իրենց աշխարհաքաղաքական ծրագրերը՝ դրանով իսկ նպաստելով Մերձավոր Արևելքում և Հյուսիսային Աֆրիկայում ահաբեկչության ակտիվացմանը: Այս մասին է հայտարարել Իրանի ԱԳ նախարար Մոհամմադ Ջավադ Զարիֆը՝ ելույթ ունենալով Մարդու իրավունքների հարցերով ՄԱԿ-ի խորհրդի բարձր մակարդակի սեգմենտի շրջանակներում, որը երկուշաբթի բացվել է Ժնևում, հաղորդում է RIA Novosti-ն:
Զարիֆը մասնավորապես նշել է, որ ԴԱԻՇ-ի («Իրաքի և Շամի իսլամական պետություն») գործունեությունը ոչ մի դեպքում չի կարելի շփոթել իսլամական արժեքների հետ, քանի որ այն հիմնված է գրոհայինների տարբեր խմբավորումների վրա:
«Այդ խմբավորումները վերածնվել և աճել են տեղական և գլոբալ խաղացողների կարճատեսության շնորհիվ: Այս ամենը, ընդ որում, շատ գեղեցիկ կերպով քողարկվել է մարդու իրավունքների պաշտպանության ներքո…»,- ասել է նա:
Իրանի ԱԳՆ-ի ղեկավարը կոչ է արել մտածել, թե ինչու են ներկա պահին այդքան մեծ թվով մարդիկ և խմբավորումներ միանում այդ ծայրահեղական գաղափարախոսությանը, «մասնակցում Եվրոպայում և ավելի մեծ ծավալներով՝ Իրաքում ու Սիրիայում գործողությունների, որոնք մենք դաժան, ահաբեկչական, սարսափեցնող ենք անվանում»:
«Վախեցնում է այն, որ ԴԱԻՇ-ի ահաբեկիչները գլխատում են խաղաղ բնակիչներին և առանց որևէ ակցենտի խոսում եվրոպական լեզուներով: Հավաքագրվածների մեծ մասը խոսում է այն մասին, որ մենք համակարգային խնդիրներ ունենք, որոնք մարգինալացման են հանգեցրել՝ ամբողջ խմբերի օտարման, որոնք դաստիարակվել և կրթվել են այսպես կոչված արևմտյան ժողովրդավարության հիմա վրա»,- նշել է նա:
Այս խնդրի լուծման հնարավոր տարբերակներից մեկը Զարիֆը մարդկանց մտածելակերպի փոփոխությունն է համարում: Մենք պետք է հրաժարվենք այն մտածելակերպից, որի համաձայն՝ ոմանք դուրս են մղվում: Սա «սառը պատերազմի» դարաշրջանի սկզբունքներից է: Հարկավոր է ընդունել, որ բոլորը հավասար են և արժանի հարգանքի»,- ընդգծել է Իրանի ԱԳ նախարարը:
