Մոսկվայի կենտրոնում ընդդիմադիր քաղաքական գործիչ Բորիս Նեմցովի սպանությունը կարող էին իրականացնել ոչ պրոֆեսիոնալները: Այս մասին է վկայում հանցագործության բալիստիկ փորձաքննությունը՝ գրում է «Կոմերսանտ»-ը՝ հղում անելով իրավապահ մարմիններում տեղեկացված աղբյուրներին:
Ինչպես նշում է թերթը, փորձագետները պարզել են, որ Նեմցովին մեջքից են կրակել: Ընդ որում՝ նրան դիպել են արձակված 6 փամփուշտներից 4-ը: Դրանցից մեկը դիպել է սրտին, ինչն էլ հենց մահացու է եղել:
Դեպքի վայրում մնացած հրազենային պարկուճները հետաքննության մոտ հարցեր են առաջացրել՝ հանցագործն օգտագործել է 9 մմ տրամաչափի փամփուշտներ՝ արտադրված տարբեր ժամանակներում և տարբեր գործարանների կողմից: Դրանցից 4-ը, դատելով պիտակից, արտադրվել են 1986թ. Չելյաբինսկի մարզի մեխանիկական գործարանում, իսկ երկուսը՝ 1992թ. Տուլայի փամփուշտների գործարանում։ Սրանից ելնելով՝ փորձագետները ենթադրում են, որ հանցագործը խնդիրներ է ունեցել զինամթերքի ձեռք բերման հետ։
Մարդասպանը կարող էր գործածել «Մակարով» ատրճանակ կամ գազային «Իժ» ատրճանակ: Հետաքննության կարծիքով՝ վարձու մարդասպանն անմիջապես ազատվել է զենքից՝ այն նետելով գետը:
Աղբյուրների խոսքով՝ այս ամենը վկայում են այն մասին, որ հանցագործությունը իրականացրել են ոչ պրոֆեսիոնալները, ովքեր կարող էին նույնիսկ չիմանալ իրենց զոհի անունը: