Քորնելի համալսարանից քիմիական մոլեկուլյար դինամիկայի մասնագետներ Ջեյմս Սթիվենսոնը և Փոլեթ Քլենսին պարզել են, որ Սատուրնի արբանյակի՝ Տիտանի վրա կարող են գոյություն ունենալ մեթանի և անթթվածնային հիմքով կյանքի ձևեր՝ ի հեճուկս այն կարծիքի, թե անջուր միջավայրում կյանքն անհնարին է: Այս մասին գրում է Korrespondent.net-ը՝ հղում անելով համալսարանի կայքին:
Համաձայն նրանց տեսության՝ մեթանի հիմքի վրա բջջային մեմբրանը կարող է թույլ տալ, որ Տիտանի վրա գոյություն ունենան կյանքի ձևեր։
Գիտնականները ոչ մեծ ազոտային միացություններից մոդելավորել են բջջային մեմբրանը, որը կարող է գործել հեղուկ մեթանի միջավայրում չափազանց ցածր ջերմաստիճանի դեպքում։
Բջիջը կազմված է ածխաջրածնի մոլեկուլներից, ազոտից և ջրածնից՝ բաղադրիչ տարրեր, որոնք գոյություն ունեն Տիտանի վրա: Գիտնականները այն անվանել են Azotosome։
