Արևմուտքի և Ռուսաստանի միջև պատժամիջոցային պատերազմի և նավթի գնի անկման պատճառով Կենտրոնական Ասիայի երկրներին սպառնում է ներդրումների արտահոսք և տնտեսության անկայունություն։ Այս մասին գրում է Vedomosti-ն՝ հղում անելով Minchenko Consulting հաղորդակցական հոլդինգի զեկույցին։
Պատժամիջոցներն ամենից շատ անդրադարձել են Ղազախստանի, Ղրղըզստանի և Տաջիկստանի վրա՝ կարծում են զեկույցի հեղինակները։ Կենտրոնաասիական տարածաշրջանի համար այլ ռիսկերի շարքում են Աֆղանստանից միջազգային զորակազմի դուրսբերումն ու ԴԱԻՇ ահաբեկչական խմբավորման գործողությունները։
Հետխորհրդային տարածքում բացասաբար են ազդել Ռուսաստանի տնտեսական անկումն ու ռուբլու արժեզրկումը՝ փաստում է Renaissance Capital տնտեսագետ Չարլզ Ռոբերտսոնը։
Ամենից շատ ռուբլու փոխարժեքի նվազումից կտուժեն Տաջիկստանը, Ղրղըզստանն ու Ուզբեկստանը՝ կանխատեսում է նա։ Համաշխարհային բանկի տվյալներով՝ Ռուսաստանի աշխատանքային միգրանտների դրամական փոխանցումները կազմում են Տաջիկստանի ՀՆԱ 42 %-ը, Մոլդովայի ՀՆԱ 25 %-ը, Հայաստանի դեպքում՝ 21%, Ղրղըզստանի դեպքում՝ 31.5%, Ուզբեկստանի դեպքում՝ 12%, Վրաստանի դեպքում՝ 12%, Ադրբեջանի դեպքում՝ 2.5%: ԱՄՀ կանխատեսումներով՝ Ռուսաստանում ընթացիկ տնտեսական վիճակի պահպանման դեպքում Կենտրոնական Ասիայի երկրների կորուստներն այս տարի կգերազանցեն 15 մլրդ դոլարը։
Ռուսաստանում տնտեսական աճի դանդաղումն ավելի ցավոտ կհարվածի նավթ ու գազ ներկրող երկրներին (Հայաստան, Վրաստան, Ղրղըզստան և Տաջիկստան), քան արտահանողներին (Ղազախստան, Ուզբեկստան, Թուրքմենստան և Ադրբեջան): Ռուսաստանի ՀՆԱ-ի 1 %-ով նվազումը կփոքրացնի դեպի կենտրոնաասիական երկրներ փոխանցումների հոսքերը 5 %-ով՝ գրում են Bank of America Merrill Lynch-ի վերլուծաբանները։
