Չեխիայի մայրաքաղաք Պրահայում կբացվի նախկին Խորհրդային Միության երկրների ակտիվիստների աջակցման միջազգային կենտրոն։ Այն նախատեսված է նրանց համար, ովքեր ճնշման են ենթարկվում իրենց կառավարությունների կողմից։ Այս մասին հայտնում է Reuters-ը։
Պրահայի քաղաքացիական հասարակության կենտրոնը բացվում է այն ժամանակ, երբ Արևմուտքն ու Ռուսաստանը խիստ լարվածության ժամանակաշրջանում են՝ Ղրիմի բռնակցման և Ուկրաինայի արևելքում ընթացող մարտերի պատճառով։
Այն ծրագրում է անցկացնել թրեյնինգներ ու սեմինարներ Հայաստանի, Բելառուսի, Ուկրաինայի, Մոլդովայի, Վրաստանի, Ադրբեջանի, ինչպես նաև Ռուսաստանի ու Կենտրոնական Ասիայի ակտիվիստների համար։
«Մենք հիմնում ենք նոր կենտրոն, քանի որ տարածաշրջանում քաղաքացիական հասարակությունը վիթխարի ներուժ ունի, մինչդեռ այն աճող ճնշման տակ է՝ հատկապես որոշ երկրներում»,- ասել է կենտրոնի տնօրեն Ռոստիսլավ Վալվոդան։
Կենտրոնը կխթանի հրապարակայնության, հանդուրժողականության, օրենքի գերակայության, մարդու իրավունքների ու արժանապատվության արժեքները։ Այն կառավարությունների փոխարինման չի ձգտում։
Կենտրոնը կստեղծվի տեղի People in Need մարդասիրական կազմակերպության կողմից, որը ֆինանսավորվում է Միջազգային զարգացման ԱՄՆ գործակալության, Շվեդիայի և Չեխիայի կառավարությունների և երկու մասնավոր ամերիկյան հիմնադրամների կողմից։
