Քիչ առաջ Պարույր Հայրիկյանին տեսակցելու եկավ Անդիրաս Ղուկասյանը: Նրան թույլ չտվեցին մտնել Պարույր Հայրիկյանի մոտ: Նրան թույլ տվեցին մտնել միայն միջանցք: Ա. Ղուկասյանին փոխանցել էին, որ այս պահին Պարույր Հայրիկյանը հանգստանում է։ Մինչ Անդրաիս Ղուկասյանը ոստիկանների հետ խոսում էր, Պարույր Հայրիկյանի կուսակիցներից Սևան Գալոշյանը ոստիկաններից պահանջում էր, որ այդ թեկնածուին էլ մյուսների նման ներս թողնեն: Նա ասում էր, որ մկներին ու Շարմազանովներին ներս եք թողնում, բայց հարազատներին և կուսակիցներին չեք թողնում, որ նրան տեսնեն:
Անդրիաս Ղուկասյանը փոխանցեց, որ բժիշկներն իրեն վստահեցրել են, որ հիվանդի վիճակը կայուն է, և նրան հանգիստ վիճակ է պետք կազդուրվելու համար:
Նա նաև ասեց,որ ինքը համաձայն է, որ Հայրիկյանի նկատմամբ կատարված մահափորձը մարտահրավեր է մեր պետականության դեմ: Այս միջադեպն, ըստ նրա, վտանգում է ընտրությունների կայունությունը և Հայաստանում անկայունություն առաջացնելու նպատակ ունի: Բոլոր դեպքերում սա քաղաքական կանոններից դուրս է:
Ըստ նրա՝ թվում է, թե երկիրը դուրս է եկել քաղաքական սպանությունների շրջանից, բայց պարզվում է, որ ինչ–որ ուժերի դա ձեռնտու չէ, իսկ թե որ ուժերին է ձեռնտու, Անդրիաս Ղուկասյանը չցանկացավ պատասխանել՝ նշելով, որ տեղեկությունը շատ քիչ է։
«Բոլոր դեպքերում սա ընտրություններին հետևանք թողնող երևույթ էր: Եթե այս ոճրագործությունը իր նպատակին հասներ, պետք է նշանակվեին նոր ընտրություններ, իսկ դա նշանակում է, որ կան քաղաքական ուժեր, որ նման զարգացումներ են սպասում, ես գրեթե անհավանական եմ համարում, որ սա անձնական հողի վրա կատարված մահափորձ է»,– ասաց Ա. Ղուկասյանը։
