Նույնիսկ եթե Իրանն ընդունի միջուկային ծրագրի վերաբերյալ Արևմուտքի պայմանները, Արևմուտքը չի վերացնի սահմանված պատժամիջոցները: Այս մասին հայտարարել է Իրանի հոգևոր առաջնորդ այաթոլլա Ալի Խամենեին Արևելյան Ադրբեջան նահանգի հասարակության ներկայացուցիչների հետ հանդիպման ժամանակ: Այս մասին հայտնում է haqqin.az-ը՝ հղում անելով իրանական ԶԼՄ-ներին:
«Արևմուտքը դեմ է Իսլամական հեղափոխության սկզբունքներին: Ես վստահ եմ, որ պատժամիջոցները կպահպանվեն՝ նույնիսկ եթե Իրանը գործի նրանց թելադրանքով»,- ասել է Խամենեին:
Նրա խոսքերով՝ Իրանն ունակ է դիմակայել պատժամիջոցներին և խափանել թշնամիների ծրագրերը:
«Հակառակ դեպքում՝ թշնամին կշարունակի պատժամիջոցներ սահմանել մեր միջուկային ծրագրի պատճառով: Նրանք օգտագործում են պատժամիջոցները, որպեսզի կանգնեցնեն առաջընթացն Իրանում»,- ասել է Խամենեին:
«Իրանն ունի գազի և նավթի աշխարհի ամենամեծ պաշարները, որոնք պետք են ԵՄ-ին և մնացած աշխարհին: Իրանի Հանրապետությունն ինքը կարող է պատժամիջոցներ սահմանել Արևմուտքի նկատմամբ, եթե դա անհրաժեշտ համարի»,- ասել է Իրանի հոգևոր առաջնորդը:
