Թուրքական «Ռադիքալ» թերթում «Թուրք-ամերիկյան հարաբերություններում լռությու՞ն փոթորկից առաջ» վերտառությամբ հոդվածում վերլուծաբան Մուրաթ Եթքինն անդրադարձել է նաև ԱՄՆ-Թուրքիա հարաբերություններում Հայոց ցեղասպանության հարցին:
Եթքինը ենթադրում է, որ առաջիկայում Թուրքիայի և Միացյալ Նահանգների հարաբերություններում որոշակի բարդություններ են լինելու: Հոդվածագիրը նշում է, որ վերջին ամիսներին Անկարայի և Վաշինգթոնի միջև շփումների պասիվություն է նկատվում: Վերջին անգամ Թուրքիայի նախագահ Էրդողանն ու ԱՄՆ-ի նախագահ Օբաման հեռախոսազրույց են ունեցել 2014 թվականի հոկտեմբերի 18-ին: Վերջին ամիսներին թուրք կամ ամերիկացի բարձրաստիճան պաշտոնյաների միջև բարձր մակարդակի հանդիպումներ չեն եղել:
Անդրադառնալով թուրք-ամերիկյան հարաբերություններում Հայոց ցեղասպանության դերին՝ Եթքինը նշում է, որ այն ռազմավարական նշանակություն ունի կողմերի համար, իսկ Ցեղասպանության 100-ամյակը լուրջ քննություն է Թուրքիայի համար ստեղծված քաղաքական պայմաններում: Հեղինակը հավելում է, որ Հարյուրամյակին Թուրքիան մոտենում է նաև առանց հրեական և արաբական լոբբինգի աջակցության: «Բացի այդ, արդեն տեղեկություն կա, որ մեծ հեռահարության հակաօդային պաշտպանության համակարգերի մրցույթը ևս Թուրքիան թողնում է ապրիլի 24-ից հետո»,-հավելում է թուրք հոդվածագիրը:
«Լռությունը կամ փոթորկի նշան է, կամ ավելի վատ բանի՝ ավելի խորը լռության: Մի՞թե այժմ թուրք-ամերիկյան հարաբերություններում լռություն է փոթորկից առաջ»,-իր հոդվածը նման տողերով է եզրափակում հոդվածագիրը:
Նշենք, որ թուրքական «Հյուրիյեթ» պարբերականը, հղում կատարելով Թուրքիայի պաշտպանության նախարարության բարձրաստիճան պաշտոնյային, նշում է, թե մեծ հեռահարության հակաօդային և հակահրթիռային պաշտպանության համակարգերի մրցույթի արդյունքների համար պաշտոնական Անկարան որոշել է սպասել ապրիլի 24-ին:
Մրցույթին մասնակցում են չինական, ֆրանսիական և ամերիկյան ընկերություններ: Հենց վերջին երկու պետության մասնակիցների համար էլ թուրքական կողմը որոշել է սպասել: Անանուն պաշտոնյան տեղեկացնում է, թե Թուրքիան որոշել է սպասել՝ տեսնելու մրցույթին մասնակցող պետությունների՝ Հայոց ցեղասպանության 100-րդ տարելիցի հետ կապված արձագանքը: Նույն պաշտոնյան նաև նշել է, որ Թուրքիան իր ընտրությունը կարող է կապել Հայոց ցեղասպանության հարցում տվյալ պետության դիրքորոշման հետ:
