«Հրապարակ» թերթը գրում է. «ԲՀԿ նախագահ Գագիկ Ծառուկյանի շուրջ իրադարձությունները զարգանում են Հայաստանի քնած քաղաքական դաշտի և գրեթե վերացած քաղաքական ընդդիմության համար անպատկերացնելի արագությամբ:
Սերժ Սարգսյանի ելույթից երեք աշխատանքային օր էլ չի անցել, սակայն արդեն ընթացք է տրվել Ծառուկյանին պատգամավորական մանդատից և անձեռնմխելիությունից զրկելու գործընթացին, հարկային խախտումների կասկածանքով ստուգումներ են սկսվել Ծառուկյանին պատկանող ձեռնարկություններում, և աշխատանքից ազատվել են Ծառուկյանի օբյեկտների պահպանությունն իրականացնող ոստիկանության աշխատակիցները: Տրամաբանորեն ամեն ինչ գնում է քաղաքական ոչնչացում, գուցե քրեական հետապնդում, եթե մինչ այդ Ծառուկյանը չհեռանա Հայաստանից՝ անհայտ ուղղությամբ:
Սարգսյանը գործում է հստակ և հատու, բացարձակապես տիրապետելով դրությանը: Ծառուկյանը, ինչպես նաև նրան փոխկապակցված եռյակը, գուցե անսպասելիությունից, գուցե անճարակությունից՝ կաթվածահար են: Նրանք չունեն ոչ գործողության հնարավորություն, ոչ հեռանկար:
Դա այլ իրադրություն էր, երբ Ծառուկյանն ու ԲՀԿ-ն նույն Սարգսյանի թողտվությամբ այլընտրանք էին «աշխատում», ըստ ամենայնի՝ ցուցարարներ հավաքագրում, վճարված փոխադրամիջոցներով Երևան տեղափոխում, Ազատության հրապարակում մի երկու ժամ դատարկախոսում: Այժմ, երբ պարզվեց, որ այլընտրանքի երանելի ժամանակները մնացին հետևում, հետևում մնացին նաև թեկուզ մի քանի հազար մարդ մոբլիզացնելու ԲՀԿ-ի ֆինանսակազմակերպչական հնարավորությունները:
Ի վերջո, Ծառուկյանի ձերբակալությունը Քոչարյանի ոչնչացում է նշանակելու»:
Մանրամասները՝ թերթի այսօրվա համարում