Հարավաֆրիկյան Հանրապետության մայրաքաղաք Պրետորիայի արվարձանում հինգշաբթի երկու գնացքների բախման հետևանքով վիրավորվել է շուրջ 200 մարդ: Այս մասին հայտնում է AFP գործակալությունը՝ հղում անելով փրկարար ծառայությանը:
Ավելի վաղ հաղորդվում էր 20 տուժածի մասին: Դեպքը տեղի էր ունեցել հինգշաբթի առավոտյան՝ ՀԱՀ-ի վարչական մայրաքաղաք Պրետորիայի արվարձանում: Գնացքներից մեկը կանգնած է եղել հարթակի մոտ, երբ մյուսը հետևից մխրճվել է նրա մեջ: Դեպքը տեղի է ունեցել ծանրաբեռնված ժամի:
20 ուղևորներ լուրջ վնասվածքներ են ստացել: Գնացքավարը գտնվում է ծայրահեղ ծանր վիճակում: Նրան հոսպիտալացրել են ուղղաթիռով: Տուժածներից առնվազն 50-ը երեխաներ են:
Վթարի պատճառները պարզվում են:
Գործակալության փոխանցմամբ՝ ՀԱՀ-ի արվարձանային գնացքների 90 տոկոսից ավելին շահագործվում է ավելի քան 50 տարի: Ամենաթարմ գնացքները 1986 թվականի արտադրության են: Տեխնիկական խոտանի պատճառով գնացքները հաճախ կանգ են առնում կայարանների միջև: Դեկտեմբերի սկզբին իշխանությունները հայտարարեցին ֆրանսիական Alstom ընկերությունից նոր գնացքներ գնելու մասին:
