Այսօր կառավարության շենքի մոտ բողոքի ակցիա անցկացրին ատամանաբույժները: «Առաջին լրատվական»-ի հետ զրույցում բժիշկ-ստոմատոլոգ Արմեն Վերդյանը հայտնեց, որ երկու օր առաջ դիմումներ են հանձնել ՀՀ նախագահին, վարչապետին, ԱԺ նախագահին, առայժմ որևէ պատասխան չկա ոչ այդ դիմումներին, ոչ մինչ այս տեղի ունեցած բողոքի ակցիաներին ու քննարկումներին:
Ատամնաբույժները պատրաստվում են փետրվարի 4-ին՝ ԱԺ արտահերթ նիստի օրը, բողոքի ակցիա անցկացնել Ազգային ժողովի շենքի մոտ: Ա. Վերդյանը նշեց, թե խոսակցություններ կան, որ հարկային փոփոխությունների խնդիրը քննարկվելու է ԱԺ-ում, և հնարավոր է արտոնագրային վճարը՝ յուրաքանչյուր ատամնաբուժական աթոռի համար 80 հազ. դրամը, նվազեցվի մինչև 60 հազ. կամ 40 հազ. դրամի:
«Մեզ անտեսում են, վերաբերվում են այնպես, ինչպես տաջիկներին Մոսկվայում: Ցանկացած պատասխանն ավելի լավ կլիներ, քան այս անտեսելը»,- ասաց Վերդյանը:
Մինչ պետական պաշտոնյաները շարունակում են արտոնագրային հարկումից բողոքողների ձայնն անտեսել, շատ ատամնաբույժներ դիմում են գրել փետրրվարի 1-ից աշխատանքը դադարեցնելու մասին: Վերդյանի խոսքերով՝ Արմավիրի մարզում ոչ մի կլինիկա վաղվանից չի աշխատելու:
