Արագածոտնի մարզի ընդհանուր իրավասության դատարանում Սուրեն Մնոյանի նախագահությամբ ավարտվել է Արտյոմ Ա.-ի գործի դատական քննությունը:
38-ամյա Արտյոմը նախկինում դատապարտված է եղել դիտավորությամբ տուժողի առողջությանը ծանր վնաս հասցնելու համար, պատժից ազատվել է 2013 թվականի հոկտեմբերին:
Իսկ 2014 թվականի դեկտեմբերի 4-ին նրան մեղադրանք է առաջադրվել բռնաբարության փորձի համար՝ ՀՀ քրեական օրենսգրքի 34-138 հոդվածի 1-ին մասով:
Ըստ մեղադրանքի՝ Արտյոմը որպես անասնապահ աշխատել է անասնապահական ֆերմայում և ժամանակավորապես բնակվել է ֆերմային հարակից տնակում: Նա ծանոթացել է նույն ֆերմայում աշխատանքի ընդունված ամուսիններ Ավագի ու Մերիի (անունները փոխված են) հետ:
2014 թվականի հոկտեմբերի 28-ին, ժամը 23-ի սահմաններում ալկոհոլ օգտագործած վիճակում Արտյոմը, օգտվելով Ավագի բացակայությունից, մտել է ամուսինների սենյակ, իջեցրել է տաբատը, ցուցադրել իրեն ու ասել, թե ցանկանում է սեռական հարաբերություն ունենալ Մերիի հետ:
Մերին դիմադրել է, գոռացել, կանչել դրսում գտնվող ամուսնուն:
Արտյոմը ձեռքով ու վառարանի մետաղե կրակխառնիչով հարվածել է Մերիին, քաշելով նրա ձեռքից՝ փորձել է բռնաբարել, բայց ձայների վրա օգնության է հասել Մերիի ամուսինը և կանխել է կնոջ նկատմամբ սեռական բռնության գործադրումը:
Ամբաստանյալ Արտյոմն իրեն մեղավոր չի ճանաչել: Նա հայտնել է, թե անասնապահական ֆերմայում է աշխատել, բայց ֆերմայի տնօրենը իրեն աշխատանքից ազատել է և աշխատանքի է ընդունել Ավագին ու նրա կնոջը:
Ամուսիններն իրենց երկու երեխաների հետ տեղափոխվել են ֆերմա:
Հոկտեմբերի 28-ին ինքն անասունները հանձնել է Ավագին:
Երեկոյան ֆերմայում ինքը «հրաժեշտի» ընթրիք է կազմակերպել, որին մասնակցել են նաև ֆերմայի տնօրենն ու նոր անասնապահ Ավագը:
Ինքը խմել է, գնացել է իր սենյակ ու քնել է:
Արթնացել է Ավագի հարվածներից: Նա առանց պատճառի ծեծում էր իրեն: Ինքը խմած էր ու չէր կարողանում պաշտպանվել: Ավագի կին Մերին փորձել է իրենց բաժանել:
Ինքը հեռացել է ֆերմայից, ցանկացել է գնալ ոստիկանություն՝ Ավագի կողմից ծեծվելու մասին հաղորդում տալու, բայց իմացել է, որ Ավագն իրենից շուտ է գնացել ոստիկանություն ու հաղորդում է տվել, իբր՝ ինքը փորձել է բռնաբարել Մերիին:
Տուժող Մերին հայտնել է, որ դեպքի օրն ինքը, ամուսինն ու երկու երեխաները տեղափոխվել են ֆերմա: Ամուսինը որպես անասնապահ էր աշխատելու, ինքը՝ որպես կթվորուհի:
Նախկին անասնապահ Արտյոմն ապրում էր իրենց սենյակի կողքի սենյակում:
Երեկոյան ինքը ցանկացել է քնեցնել երեխաներին: Ամուսինը դուրս է եկել՝ կարիքները հոգալու:
Այդ ժամանակ իրենց սենյակ է մտել խմած Արտյոմը: Նա ասել է, թե կին չունի, ցանկանում է իր հետ կենակցել:
Ինքը պահանջել է, որ նա դուրս գա սենյակից:
Բայց Արտյոմն իջեցրել է տաբատն ու սկսել է մոտենալ իրեն: Նրա հագին սպիտակեղեն չի եղել:
Ինքը հետ-հետ է գնացել՝ դեպի սենյակում գտնվող վառարանը:
Սկսել է կանչել ամուսնուն: Արտյոմը մնացել է վառարանի հակառակ կողմում, վերցրել է մետաղե կրակխառնիչը, դրանով հարվածել է իր ձեռքի մատներին, մի անգամ էլ բռունցքով խփել է իր դեմքին:
Այդ պահին սենյակ է մտել իր ամուսինը: Նա Արտյոմին ծեծելով դուրս է բերել սենյակից:
Իրենք զանգահարել են ֆերմայի տնօրենին, կանչել ու պատմել են կատարվածը: Դրանից հետո ամուսինն ու ֆերմայի տնօրենը գնացել են ոստիկանություն:
Դատաբժշկական փորձաքննության եզրակացությամբ հաստատվել է, որ վնասվածքներ կան Մերիի դեմքի ու ձախ դաստակի շրջաններում:
Ընդհանուր իրավասության դատարանը հաշվի է առել Արտյոմի կողմից հանցագործությունների կատարման ռեցիդիվը և հանցավոր արարքը ալկոհոլի ազդեցության տակ կատարելը:
Արտյոմ Ա.-ն մեղավոր է ճանաչվել բռնաբարության փորձ կատարելու համար և դատապարտվել է 3 տարի 3 ամիս ազատազրկման:
