ԱԺ պատգամավոր Վարդան Այվազյանը նախօրեին, «Առաջին լրատվական»-ի հետր զրույցում հայտնեց, որ գազի գինը պետք է վերանայվի. «Դրամի արժեզրկումն առաջ է բերել որոշակի խնդիրներ, պետք է հարց բարձրացվի, և սակագնի մեջ ճշտումներ մտցվեն»:
«ՀայՌուսգագարդ» ՓԲԸ–ի հասարակայնության հետ կապերի ծառայություն պետ Շուշան Սարդարյանը, «Առաջին լրատվական»-ի հետ զրույցում անդրադառնալով գազի գների վերանայման հարցին, նշեց, որ այս պահի դրությամբ նման հարց չի քննարկվում:
«Մենք ամենօրյա մոնիթորինգ ենք իրականացնում՝ կապված ընկերության գործունեության և ֆինանսատնտեսական արդյունքների վրա փոխարժեքի ազդեցության հետ: Գների վերանայման հարց չի որոշվել, կարծում եմ՝ նրանք, ովքեր նման հարց են բարձրացրել, իրենք էլ պետք է մեկնաբանեն»,-հայտնեց ընկերության ներկայացուցիչը:
Սարդարյանի խոսքերով՝ իրենք տնտեսվարող կառույց են և գործում են իրենց իրավասության շրջանակներում՝ գնահատելով միայն ընկերության ռիսկերը:
Վերջինս նշեց, որ ընկերության պայմանագրերով ամրագրված է, որ գազի դիմաց վճարումներն իրականացվելու են դոլարով, ընդ որում՝ այս կետն երկարաժամկետ դրույթ է:
«Գործող սակագնի հիմքում դոլարի դիմաց փոխարժեքը սահմանված է 416 դրամ, իսկ այսօր պաշտոնական փոխարժեքը բավական տարբերվում է նշված սակագնայինից»,- տեղեկացրեց Սարդարյանը:
Նշենք, որ պատգամավոր Վարդան Այվազյանը բերել էր նման հաշվարկ, որ գազի համար վճարվող 156 հազար դրամը նախկին 383 դոլարն է, գազի համար միջին կշռված գինը 312 դոլարն է. «Եթե քաղաքացին 383 դոլարին համարժեք վճարի՝ գազի սակագինը պետք է բարձրանա 22 հազար դրամով, սակայն պայմանավորվածություն կա, որ վճարումը լինելու է նախկին գներով, այսինքն՝ դա նշանակում է, որ մոտ 30-40 դոլար գազը դե ֆակտո էժանանում է»: