Երեկույթներ ու խնջույքներ սիրող մայրը խոստովանել է, որ իր աղջկան ալկոհոլ է տվել 3 տարեկանից սկսած, երեխան, դեռահաս դառնալով, կարողացել է «ճիշտ խմել», հայտնում է fedpost.ru-ն:
Բժիշկները քննադատել են 35-ամյա Շենոն Բերրոուզի գործողություններն այն բանից հետո, երբ նա խոստովանել է, որ իր դուստր Ջեյմի Լին, որը հիմա 20 տարեկան է, առաջին անգամ ալկոհոլ փորձել է երեխա ժամանակ: Մեծանալով՝ Ջեյմին խմել է մեկ տարա Fosters ամեն հանգստյան օր, իսկ իր 15-ամյակի տոնի ժամանակ աղջիկը մորից, որպես նվեր, մեկ շիշ օղի է ստացել:
Այն ժամանակ, երբ նա դարձել է չափահաս և սկսել խմել բարերում, մոր հետ մինչև առավոտվա 4-ը զբոսնել է գիշերային ակումբներում և ալկոհոլ խմել:
«Մենք սիրում ենք միասին խմել: Եթե նա կորցնում է վերահսկողությունը, ես հետևում եմ նրան և հակառակը: Մենք լավագույն ընկերուհիների նման ենք: Մենք միասին հրաշալի ժամանակ ենք անցկացնում»,- ասում է Շենոնը:
Բայց բժիշկ Սառա Ջարվիսը նախազգուշացնում է, որ երեխաները չպետք է ալկոհոլ օգտագործեն, և այն, որ կինը վաղ տարիքից երեխային ալկոհոլ է տվել, կարող է լրջորեն ազդել դստեր առողջության վրա: Դա կարող է հանգեցնել ուղեղի վնասման, նաև կարող է դառնալ երկարատև հիշողության կորստի պատճառ, լյարդի հետ կապված խնդիրներ առաջացնել, նա նաև կարող է հոգեբանական կախվածություն ձեռք բերել ալկոհոլից:
Շենոնն իր երեկույթների հաշիվները վճարում է իր ամուսնու՝ 50-ամյա այգեպան-դեկորատորի վաստակած գումարով: Նա նաև երեխայի համար նպաստ է ստանում՝ ամսական մոտ 400 դոլար:
Նրա ամուսինը նաև հոգ է տանում նրա մյուս երեխաների՝ 12-ամյա որդու և 9-ամյա դստեր մասին: Շենոնը հայտնել է, որ միշտ ցանկացել է, որ իր աղջիկը կարողանա «ճիշտ» խմել և որ ինքը երեկույթների ընկերուհի ունենա:
Ինքը սկսել է խմել 14 տարեկանից և հաճախ այնքան է խմել, որ ընկել է փողոցում: Որոշ դեպքերում նրան ոստիկանությունն է տուն տարել: Մայրն ասել է, որ չի անհանգստանում դստեր առողջության համար, քանի որ դեռահասները «շատ ճկուն են»:
Ջեյմի Լին արդեն 6 ամիս գործազուրկ է այն բանից հետո, երբ նրան հեռացրել են հագուստի խանութից: Նա ասում է, որ շնորհակալ է իր մորը նրա համար, որ նա իրեն «կայուն է դարձրել ալկոհոլի նկատմամբ»:
