Գերմանիայի ընդդիմադիր «Ձախ» կուսակցության՝ Դաշնային խորհրդարանի խմբակցությունը Հայոց ցեղասպանության վերաբերյալ առաջարկ է պատրաստել և ներկայացրել Բունդեսթագ:
Թուրքական «Հյուրիյեթ» պարբերականի փոխանցմամբ՝ «Մեր օրերում Հայաստանի հետ Գերմանիայի հարաբերությունների և հայերի ու ասորիների ցեղասպանության հիշատակման» վերաբերյալ առաջարկը ստորագրել են Ձախ կուսակցությունից մի խումբ պատգամավորներ՝ խմբակցության ղեկավար Գրեգոր Գիզիի գլխավորությամբ:
Ըստ «Հյուրիյեթի»՝ Բունդեսթագ ներկայացված առաջարկում նշված է, որ «Եվրոպայի ամենաաղքատ և բնակչության 1/3-ն աղքատության շեմին գտնվող Հայաստանն արևմուտքից Թուրքիայի և արևելքից Ադրբեջանի կողմից շրջափակման մեջ է»: Թուրքական աղբյուրը նաև հավելում է, որ օրինագծում նշված է, թե «1.5 մլն հայերի մահվան պատճառ դարձած իրադարձություններում դերակատարում է ունեցել նաև Կայսերական Գերմանիան, դերակատարում են ունեցել նաև 800 գերմանացի սպաները և 25.000 գերմանացի զինվորները»: Առաջարկի մեջ ընդդիմադիր կուսակցությունը հարց է բարձրացրել, թե Գերմանիայի ղեկավարությունից ո՞վ է մասնակցելու Ցեղասպանության 100-րդ տարելիցի միջոցառումներին և արդյո՞ք ընդհանրապես Գերմանիան մասնակցություն է ունենալու:
Հավելենք, որ Գերմանիայի խորհրդարանը 2005 թվականին ընդունել է Հայոց ցեղասպանությունը ճանաչելու մասին որոշում: Բունդեսթագի որոշման մեջ, սակայն, չի օգտագործվել «Հայոց ցեղասպանություն» եզրը, այլ նշվել է «հայերի կոտորածներ»:
