Ռուսաստանը «տրամադրություն» չունի Լեռնային Ղարաբաղի խնդրով զբաղվելու համար: Այս մասին ադրբեջանական Trend գործակալությանը հայտնել է Ադրբեջանում ԱՄՆ-ի նախկին դեսպան, ԵԱՀԿ Մինսկի խմբի նախկին համանախագահ Մեթյու Բրայզան:
Խոսելով Լեռնային Ղարաբաղի հակամարտության հարցում Ռուաստանի դերակատարության մասին՝ Բրայզան նշել է, որ Ուկրաինայի շուրջ տիրող իրավիճակի պատճառով Ռուսաստանը ո՛չ տրամադրություն ունի, ո՛չ էլ ցանկություն՝ ԼՂ կարգավորմանն ընթացք տալու համար:
Բրայզայի խոսքով՝ Ռուսաստանը հսկայական ազդեցություն ունի Հայաստանի վրա, մասնավորապես՝ Հայաստանում ռուսական ռազմաբազա կա, ռուս ներդրողները վերահսկում են երկրի բոլոր խոշորագույն ենթակառուցվածքները:
Ինչ վերաբերում է ԼՂ հակամարտության կարգավորման միջնորդներին (ԵԱՀԿ ՄԽ), նրանք էլ, Բրայզայի կարծիքով, բավականաչափ նախաձեռնող չեն տվյալ հարցում և ռազմավարորեն չեն մտածում: «Ոչ ոք չի կարող միջնորդ լինել՝ պատրաստ չլինելով ինտելեկտուալ աշխատանքի և կետեր գտնելու համար համբերություն չունենալով», – ասել է Բրայզան:
