Այս տարվա հունվարի 1-ից ուժի մեջ մտած «Արտոնագրային վճարների մասին» ՀՀ օրենքով ներդրված հարկման նոր մեխանիզմի «արդյունքներն» արդեն երևում են. Երևանում և մարզերում մեկը մյուսի հետևից փակվում ու չաշխատելու հայտեր են ներկայացնում ատամնաբուժական կլինիկաներ, իսկ ոլորտի մասնագետները պատրաստվում են արտագաղթել ՀՀ-ից: Երկրից հեռանալու ծրագրեր մշակող ատամնաբույժներից մեկը, ով չցանկացավ անունը հրապարակել՝ հետագա խնդիրներից խուսափելու համար, «Առաջին լրատվական»-ի հետ զրույցում հայտնեց, որ իր շրջապատում առնվազն 64 ընտանիքներ արդեն «ճամրուկներն են հավաքում»:
Ըստ նրա՝ ամանորյա տոներից հետո ստոմատոլոգների բարձրացրած բողքի ալիքը ոչ մի արդյունք չի տվել և պաշտոնյաների հետ տարբեր հանդիպումներն անարդյունք են ավարտվել: Վերջերս կայացել է շուրջ 1500 ստոմատոլոգների հանդիպում, որի ժամանակ քննարկվել են խնդիրները, և որին հրավիրված են եղել նաև պետական կառույցների ներկայացուցիչներ, սակայն նրաք պարզապես չեն եկել հանդիպման:
Հիշեցնենք, որ նոր օրենքով Երևանի կենտրոնում մինչև երեք ատամնաբուժական աթոռ ունեցող կլինիկաները յուրաքանչյուրի համար պետք է վճարեն 80 հազ. դրամ, իսկ ծայրամասերինը՝ 60 հազ. դրամ:
Ատամնաբույժներն արդեն վճարելե ն 2 ամսվա գումարը, հակառակ դեպքում տույժ ու տուգանքների կենթարկվեին:
«Ռուսաստանը բոլորովին էլ քաղցր չի մեզ համար, բայց եթե հիմա օրենքը փոխեն էլ, չի օգնի՝ հավատը կորցրել ենք, չգիտենք, թե 1 տարի հետո ինչ կլինի: Պաշտոնյաների հետ քննարկվի-չքննարկվի, արդեն իմաստ չունի, ուղղակի պետք է փախնել էս երկրից: Հիմա ոսկի էլ բերեն-դնեն իմ առջև, ես չեմ հավատում, որ 1 տարի հետո լավ կլինի»,- ասաց մեր զրուցակիցը՝ նշելով, որ ատամնաբուժական ծառայության գները կթանկանան 2 անգամ, իսկ տարվա վերջին ապահովագրությունն է պարտադրվելու, որի հետևանքով ատամնաբուժական ծառայությունները ոչ թե ոչ շահավետ, այլ վնասաբեր կդառնան:
