Ադրբեջանական APA լրատվական գործակալության հաղորդմամբ, Բաքվում ադրբեջանական լրատվամիջոցներին տված հարցազրույցի ժամանակ Եվրոպայի խորհրդի Խորհրդարանական վեհաժողովի (ԵԽԽՎ) նախագահ Մեվլութ Չավուշօղլուն անդրադարձել է Լեռնային Ղարաբաղի հիմնախնդրին.
«ԵԽԽՎ-ի անդամները կորոշեն Լեռնային Ղարաբաղի շուրջ ենթակոմիտեի նիստի անցկացման ժամկետն ու դրանում արծարծվելիք խնդիրները: Արդեն նշանակված են այդ ենթակոմիտեի անդամներն ու ղեկավար կազմը: Մեր առաջադրանքը այդպիսի ենթակոմիտե ստեղծելն էր, և մենք ստեղծել ենք:
Ինչ վերաբերում է հայկական կողմի՝ դրա աշխատանքներին մասնակցելուց հրաժարվելուն, ապա ԵԽԽՎ առաջադրանքը Լեռնային Ղարաբաղի հակամարտության կարգավորմանն աջակցություն ցուցաբերելն է: ԵԱՀԿ Մինսկի խումբն աշխատում է այդ ուղղությամբ: Մենք մեր առջև խնդիր չենք դրել միջամտելու նրա գործունեությանը:
Հակամարտող կողմերի միջև պետք է վստահություն լինի: Լեռնային Ղարաբաղի շուրջ ենթակոմիտեն ստեղծվել է բարի նպատակներով: Դրա ստեղծման որոշումը կայացրել է ԵԽԽՎ-ն: Վերջինիս անդամները պետք է ենթարկվեն այդ որոշմանը, և մասնակցեն կոմիտեի նիստերին: Հայկական կողմն ինքը կորոշի մասնակցե՞լ դրանց, թե՞ ոչ: Մենք չենք կարող այդ կապակցությամբ որոշում ընդունել»:
Իր եզրափակիչ խոսքում Չավուշօղլուն անդրադարձել է Երևան-Ստեփանակերտ թռիչքների կազմակերպմանը. «ԵԽԽՎ-ն ընդունել է Հայաստանի կողմից «Ադրբեջանի տարածքի զավթումը» դատապարտող բանաձևեր, և մեր դիրքորոշումն այդ հարցում չի փոխվել: Եթե ադրբեջանական կողմը ցանկանա, ապա կարող է տվյալ խնդիրը բարձրացնել ԵԽԽՎ հաջորդ նստաշրջանում»:
Հիշեցնենք, որ թուրք Մեվլութ Չավուշօղլուն ԵԽԽՎ նախագահ է դարձել 2010 թվականի հունվարին:
