ԱԺ ՀՅԴ խմբակցության ղեկավար Վահան Հովհաննիսյանն այսօր «Սիվիլիթաս» հիմնադրամում կայացած քննարկման ժամանակ ասաց, թե ՀՅԴ հեղինակած ԸՕ նախագծի վերաբերյալ կառավարության կողմից ոչ մի լուրջ հակափաստարկ չեղավ:
Նրա խոսքերով, կառավարությունն ինչ-որ անհայտ էքսպերտների ու անհայտ փաստաթղթեր վկայակոչեց` հիմնավորելու համար, թե ինչու չի ընդունում իրենց նախագիծը: «Կառավարության կողմից դիմադրությունն այս անգամ շատ ավելի թույլ էր, քան երբևէ: Բայց եթե այդքան վստահ եք, որ մեծամասնություն եք կազմելու, ժողովուրդը խելագարվում է ձեզ համար, ուրեմն` ընդունեք մեր առաջարկությունները»,- կոչ արեց պարոն Հովհաննիսյանը:
Դիտարկմանը, որ եթե ՀՅԴ-ն իսկական ընդդիմություն լիներ, ապա նրանց «Երկիր-Մեդիա» հեռուստաընկերությունը խնդիրներ կունենար, իսկ կուսակցությունում էլ չէին լինի մի շարք օլիգարխներ, Վահան Հովհաննիսյանն ասաց. «Դաշնակցության մեջ օլիգարխ չկա: Դաշնակցության մեջ կան մարդիկ, որոնք ավելի հարուստ են, քան մյուսները, բայց օլիգախ` հայաստանյան առումով չկա: Օլիգարխը Հայաստանում իշխանության հետ սերտաճած մարդն է: Եթե ոմանք կարծում են, որ դաշնակցականները, ի տարբերություն այլ քաղաքացիների, պետք է սարերում վրանների մեջ ապրեին, մոսիններն ուսին գցած, պատրոնդաշը երգելիս, ապա դա այդպես չէ: Մեր մեջ կան մտավորականներ, կան գրողներ, կան բիզնեսմեններ, որոնց մի մասն անհաջողակ է և կորցնում է կարողությունը, իսկ մյուս մասը հաջողակ է»:
Նա դրական գնահատեց փաստը, որ երկրում կուսակցական պատկանելության համար անմիջապես չեն ձերբակալում: «Օրինակ` մենք ստիպված ենք եղել մարզերից մեկում ցույց անել, որովհետև բոլոր դաշնակցական պաշտոնյաներին մարզպետը հեռացրել էր աշխատանքից` դաշնակցական լինելու համար»,- հայտարարեց նա` հավելելով, որ ՀՅԴ-ականներն էլ են նեղություն կրում, ուղղակի հասարակությունն այս ամենը չի տեսնում:
«Ուղղակի մենք նվնվալու սովորություն չունենք»,- մեկնաբանեց նա: